Îlham Ehmed: Kiryarên li Efrînê pêşî li ber vegera koçberan digirin

NAVENDA NÛÇEYAN — Siyasetmedar Îlham Ehmed ragihand ku tevî vegera xelkê Efrînê ya bo herêmên xwe yên resen di çarçoveya peymana entegrekirinê de, lê mayîna çekdarên ji derveyî herêmê û kiryarên wan rê li ber vegera koçberên din digire.

Çekdarên Biyanî û Astengiyên Li Efrînê

Siyasetmedar Îlham Ehmed ji ANHA’yê re axivî û destnîşan kir ku vegerandina xelkê Efrînê ya li herêmên xwe yên resen ji bo wan deskeftiyeke mezin e û yek ji berhema peymana entegrekirina bi dewleta Sûriyeyê re ye. Îlham Ehmed bal kişand ser rewşa Efrînê û got: “Em mayîna çekdarên biyanî li herêmê dişopînin. Mayîna wan li Efrînê li ber vegera koçberan dibe asteng. Li Efrîn û gundewarên wê destdirêjî li mal û erdên çandiniyê yê gel tê kirin. Destê xwe datînin ser zeytûnên gel û biryarên derqanûnî li ser gel ferz dikin û wan tengav dikin. Dema ku ew kes destê xwe datînin ser mal û milkê gel li ber vegera wan dibin asteng û hinek koçberên ku vegeriyan neçar dimînin ku malan kirê bikin, heyanî ku destê xwe li ser malên wan rakin. Bi van kiryaran qanûnan binpê dikin.”

Banga Ji Bo Parastina Sivîlan û Aştiya Civakî

Îlham Ehmed wiha pêde çû: “Em qebûl nakin ku destê xwe deynin ser mal û milkên gel. Parastina sivîlan, çareserkirina pirsgirêkên ewlehiyê û rê li ber van kiryaran girtin, ji Wezareta Parastinê û saziyên ewlehiyê tê xwestin. Ez bang li wan dikim ku li gazincên gel guhdar bikin, pirsgirêka destdanîna ser mal û milkên xelkê herêmê çareser bikin, mal û milkên gel li wan vegerînin da ku aştiya civakî were parastin û aramî li herêmê çêbe.”

Pêşeroja Bûyeran

Pêşketinên li herêmê nîşan dide ku çareserkirina pirsgirêkên ewlehiyê û parastina mafên sivîlan ji bo misogerkirina vegera koçberan û avakirina aramiyê xwedî giraniyek bingehîn e.

Çavkanî: Rojnews Kurmancî