Bi biryarnameyê ji kar hate dûrxistin, hate girtin, bi NÇM’ê li muzîkê vegeriya

ENQERE — Engîn Cengîz ku sala 2016’an bi biryarnameyê ji mamostetiya muzîkê hate dûrxistin û demekê girtî ma, piştî zor û zehmetiyên işandî li Navenda Çanda Mezopotamyayê careke din li muzîkê vegeriya.

Pêvajoya Dûrxistina ji Wezîfeyê

Piştî hewldana darbeyê ya 15’ê Tîrmeha 2016’an bi biryarnameyên di dema rewşa awarte de hate derxistin zêdeyî 125 hezar wezîfedarên cemaweriyê ji wezîfeya xwe hatin dûrxistin. Desthilatdarî weke tedbîrên li hemberî kesên tevlî darbeyê bûn xwedî li vê kiryarê derket. Di vê pêvajoyê de gelek xebatkarên cemaweriyê yên muxalîf jî ji wezîfeya xwe hatin dûrxistin. Yek ji van jî mamosteyê muzîkê Engîn Cengîz e ku niha di bin sîwana Navenda Çanda Mezopotamyayê (NÇM) de mamostetiya muzîkê dike. Cengîz pêvajoya biryarnameyê, dûrxistina ji wezîfeyê û naskirina NÇM’ê ji ajansa me re nirxand.

Tecrûbeya 15 Salî û Astengiyên Sendîkayî

Destpêkê qala dûrxistina bi biryarnameyê kir û got, “Wê demê xwedî tecrûbeya mamostetiyê ya 15 salan bûm Ez mamosteyê muzîkê bûm û demeke dirêj li Meletiyê xebitîm. Beriya wê li qada sendîkayî min kar dikir, li qada kedê bûm.”

Bûyerên Kobanê û Hedefgirtin

Engîn Cengîz diyar kir ku wê demê li ser Rojava, li Sûriyeyê şerekî navxweyî, êrişeke gelekî giran hebû û got, “Ya rast, qutbûn li wir destpê kir. Ji ber bûyerên Kobanê meha Kanûnê ji bo du rojan grev hebû. Ji ber ku em tevlî wê derê bûn li gel gelek hevalên xwe em yekser bûn hedef. Ji ber cihê lê dixebitîm timî li pêş bûm. Piştre jî li dû hewldana darbeyê bi biryarnameyê ji wezîfeyê hatim dûrxistin.”

Pêşeroja Bûyeran

Cengîz anî ziman ku di salvegera damezrandina komarê de ji wezîfeyê hate dûrxistin, di demekê de ku daxwaza komara demokratîk dikir, 29’ê Cotmehê ji wezîfeyê hate dûrxistin.

Çavkanî: ANF Kurmancî