KURDISTAN — Bikaranîna naylonê li nav zeviyên çandiniyê ji aliyê cotkaran ve yek kiryarek metirsîdar e û pisporên jîngehê diyar dikin ku mayîna naylonê di nav axê de hemû bakterî, mikrop û candarên sûdbex dikuje, ku ev yek dibe sedem şinatiyên di axê de tune bibin.
- Di roja me de cotkar bi awayekî berfireh ji bo çandina fêkî, kulind û xiyaran naylonê bikar tînin.
- Piştî ku kar qediya, cotkar naylonê berhev nakin û ev yek dibe sedema belavbûna gelek nexweşiyan, şewat û karesatên mezin.
- Dr. Karzan Abdullah destnîşan kir ku zirara naylonê ya li ser ax û jîngehê gelekî ji feydeyên wê yên demkî mezintir e.
Îcada herî xeternak a çandiniya pîşesaziyê
Têkildarî mijarê pisporê jîngehê Dr. Karzan Abdullah ji ajansa me re axivî û got: “Bikaranîna naylonê ji bo çandiniyê yek ji îcadên herî xeternak di çandiniya pîşesaziyê de ye. Cotkar naylonê bi sûdek hindik bikar tînin. Ji ber ku dema naylon li ser berheman tê vedan, giyayên zirardar di axê de şîn nabin. Ji bilî wê dikare tovan zûtir biçîne da ku germê çêbike. Carnan di hewaya pir germ de şilbûnê çêdike û avdana ax û çandiniyan kêmtir hewce dike. Lêbelê, di rastiyê de, zirara ku ji ber naylonê çêdibe ji vê pir mezintir e.”
Bargiraniyek mezin li ser ax, av û hewayê
Pisporê jîngehê di dewamê de bal kişand ser bandorên demdirêj ên naylonê û got: “Ger hûn naylonê du-sê salan bikar bînin û neyên berhevkirin û rakirin, dê zirareke mezin li ax û jîngehê bibe, wê demê ewê bibe bargiraniyek li ser ax û av û hewayê.”
Pêşeroja Bûyeran
Dr. Karzan Abdullah di dawiya axaftina xwe de têkildarî mijarê nimûneyek da û got ku yek ji pirsgirêkan ewe ku cotkar piştî ku karê xwe di erdê de diqedînin naylonê dernaxin û dîsa nakolin, ev yek jî rê li ber wê yekê digire ku ax madeya organîk biparêze.
Çavkanî: Rojnews Kurmancî