DUREN — Yekîtiya Jinên Kurd li Elmanyayê (YJK-E) û Konfederasyona Civakên Demokratîk a Kurdistaniyên li Elmanyayê (KON-MED) bi tundî qetilkirina Vesîle Akin a dayika pênc zarokan 35 salî ya li Durenê dijî ya ji aliyê hevjînê wê ve şermezar kir û ji ber neparastina wê bertekên xwe nîşanî dewletê da.
- Vesîle Akin a 35 salî û dayika pênc zarokan, li bajarê Duren ê Elmanyayê ji aliyê hevjînê xwe yê ku ji hev cuda dijîn ve bi kêrê hate qetilkirin.
- Tê diyarkirin ku Vesîle Akin beriya niha bi egera ku gef lê hatine xwarin serî li polîsan daye û daxwaza parastinê kiriye, lê tevî tedbîrên dûrxistinê jî nehate parastin.
- YJK-E û KON-MED’ê diyar kirin ku qetilkirina jinan polîtîk e û divê biryarên parastinê li ser kaxezê nemînin.
Nav û bajar diguherin lê belê tundiya mêran naguhere
Yekîtiya Jinên Kurd li Elmanyayê (YJK-E) û Konfederasyona Civakên Demokratîk a Kurdistaniyên li Elmanyayê (KON-MED) di daxuyaniya xwe ya nivîskî de got: ”Me bi hêrs û xemgîniyeke mezin bihîst ku Vesîle Akin a li bajarê Duren ê Elmanyayê dijî ya 35 salî û dayîka pênc zarokan ji aliyê hevjînê xwe yê ku ji hev cuda dijîn ve bi kêrê hatiye qetilkirin.”
Di daxuyaniyê de ev yek hatin gotin: ”Demeke kurt beriya niha me li hemberî qetilkirina Endayê ya li Coesfeldê dengê xwe bilind kiribû. Roja îroyîn em dubare dibin şahidê qetilkirina jineke din. Nav û bajar diguherin lê belê tundiya mêran û êşên jin dikşînin, naguherin.”
Tundiya li ser jinan bes ne berpirsiyariya jinan e, berpirsiyariya hemû civakê ye. Qetilkirina jinekê, êrîşeke li hemberî pêşeroja civakê û jiyana hevpar e.
Tevî serlêdana ji bo parastinê jî nehate parastin
Li gorî agahiyên li ser çapemeniyê Vesîle Akin, beriya niha bi egera ku gef lê hatine xwarin serî li polîsan daye û daxwaza parastinê kiriye. Tê diyarkirin ku tevî tedbîrên dûrxistinê jî gef lê hatine xwarin. Lê belê Vesîle Akin nehate parastin. Roja îroyîn pênc zarok bê dayîk man.
Dema ku jinek diyar dike ku gef lê tên xwarin, alîkariyê dixwaze û ji bo parastinê serî li dewletê dide ji bo pêşîlêgirtina qetilkirina wê divê hê çi bike?
Pêşeroja Bûyeran
Qetilkirina jinan polîtîk e! Divê biryarên parastinê li ser kaxezê nemîne û mafê jiyana jinan were misogerkirin. YJK-E û KON-MED’ê diyar kirin ku divê berpirsiyarên îhmalên muhtemel di vê cînayetê de hesabê bidin.
Çavkanî: ANF Kurmancî