Li Îtalyayê zêdetirî 300 dibistanan îxbara bombeyê hate kirin

ROMA — Li seranserê Îtalyayê zêdetirî 300 dibistanan îxbara bombeyê hate kirin û li ser vê yekê gelek dibistan hatin valakirin. Serokwezîr Giorgia Meloni banga lidarxistina civîneke lezgîn kir.

Bi Sedan Dibistan Hatin Valakirin

Li Îtalyayê 11’ê Mijdarê roja Çarşemê li seranserê welêt bi sedan dibistanan re bi rêya e-postayên nediyar îxbarên bombeyê hatin kirin. Li bajarên weke Roma, Torino, Napoli, Bergamo û Milanoyê li gelek dibistanan kontrolên valakirin û ewlehiyê hatin kirin. Wezîrê Perwerdeyê yê Îtalyayê Giuseppe Valditara diyar kir ku nêzîkî 300 dibistanan îxbarên bombeyê standine.

Naveroka Peyaman û Îmza

Li gorî ANSA’yê, di peyaman de îfadeyên weke ‘’Em ê we tune bikin’’ hatine bikaranîn. Hate diyarkirin ku e-posta bi îmzeya Mikhail Antropov hatine şandin û ji navê ku xwe weke serokê Vilayat of Misoginistanê daye naskirin, hatine.

Helwesta Hikûmetê û Civîna Lezgîn

Serokwezîr Giorgia Meloni anî ziman ku hêzên ewlehiyê û saziyên eleqedar bi hesasiyeteke mezin îxbaran lêkolîn dikin û got ku di kontrolên heya niha hatine kirin de talûkeyeke şênber nehatiye tespîtkirin. Serokwezîr Giorgia Meloni bi armanca nirxandina geşedanan û koordînekirina tedbîrên ku werin standin ferman da ku di saet 16.00’an de civîna hikûmetê were lidarxistin. Tê payîn ku alîkarên serokwezîr, wezîrên eleqedar, rayedarên îstixbaratê û rêveberên Ajansa Ewlehiya Sîber a Neteweyî beşdarî civînê bibin.

Pêşeroja Bûyeran

Wezîrê Parastinê Guido Crosetto anî ziman ku îxbar bi armanca tirsandinê hatine kirin. Wezîrê Perwerdeyê Valditara jî destnîşan kir ku li gorî nirxandinên heyî, gefeke bombeyê ya şênber tune ye lê belê yekîneyên ewlehiyê lêkolînên xwe didomînin, her wiha hate bîrxistin ku li Îtalyayê çend rojan beriya niha jî nêzîkî ji 280 rêveberan re îxbar hatibûn kirin.

Çavkanî: ANF Kurmancî