NAVENDA NÛÇEYAN – Li Bakur û Rojhilatê Sûriyê, çalakiyên Yekîtiya Jinên Ciwan bi boneya 8’ê Adarê Roja Cîhanî ya Jinên Kedkar di bin drûşmeya “Bi hev re şoreşa xwe biparêzin û xaka xwe rizgar bikin” berdewam dikin.
ŞEHBA
Ji aliyê Yekîtiya Jinên Ciwan ên herêma Efrînê ji bo pêşwaziya 8’ê Adarê, di bin drûşmeya ” Ji Sarayan heya, Viyan, Nûjiyan û Rojînan, emê bi tolhildanê agirê azadiyê geş bikin” şahiyek li darxistin. Bi deşdariya girseyeke jinên ciwan li navçeya Ehdasê şahî hate li darxistin. Di heman demê de li ser navê Yekîneyên Parastina Jin YPJ’ê ve , Hêlîn Qereçox axifî û di nava axaftina xwe de balkişand hêza jin ya leşkerî û got; “8’ê Adarê wê bibe destpêka rizgarkirina hemû deverên dagirkirî û wê têkoşîna jinê ya li dijî zihniyeta paşverû her bilindtir bibe, û heya ku jin azad nebe wê dev ji têkoşîna xwe bernede. Îro jî hêza me YPJ’ê bi rihekî fedayî di çeperan de li hember dagirkerê sedê salan li berxwedidin.”
Di nava şahiyê de koma stranan ya şehîd Nûjiyan Serdoz stranên xwe pêşkêş kirin, her wiha takekesî jî stran hatin gotin, hem bi zimanê erebî û hem jî bi kurmancî hate gotin. Di dawiyê de bi dîlana beşdarvanan re şahî bi dawî bû.
TEBQA
Komîteya amadekar a çalakiyên 8’ê Adarê, bi beşdarbûna jin û nûnerên jin ên saziyên sivîl û leşkerî şahiyek li erdê bajarê werzîşê yê rojava Tebqayê li dar xist.
Piştî deqeyeke rêzgirtinê, berdevka Nivîsgeha Kombûna Jinan a Zenûbya ya Tebqayê Neîme El-Eswed axivî û wiha got: “8’ê Adarê sembola têkoşîna jinane û berxwedana li hember zilm, tundî û koletiyê ye û her roj cejna jinê ye.”
Neîme El-Eswed ev roj li jinên cîhanê û Bakur-Rojhilatê Sûriyê pîroz kir.
Hevseroka Meclîsa Rêveber a Tebqa Hind El-Elî da zanîn ku şoreşa 8’ê Adarê ji Ewropa dest pê kir, lê belê berhemên wê yên rastîn li Bakur û Rojhilatê Sûriyê xuya kir û gelek fedekariyên şehîdan hene ku rê li pêş jinê vekirin mafên xwe bistînin.
Piştî axaftin bi dawî bûn, koma Beraim El-Furat stran û şano pêşkêş kirin, her wiha koma Zenûbya ya navenda çand û hunerê ya Tebqa, koma hunerên gel a govendan a Reqayê, koma govendê ya Tirkmenî ya Minbicê hunerên xwe pêşkêş kirin.
Piştî koman hunerên xwe pêşkêş kirin, Rêveberiya Sivîl a Tebqayê, rêxistina civaka sivîl, Meclisa Partiya Sûriya Pêşerojê ya Tebqa peyamên pîrozbahiyê ji rêxistinên jinan ên li bajêr şandin.
Li dawiyê, navenda çand û hunerê şanoyek li ser azarên jinan li hember dojeha koletiyê, çawa xwe ji kelepçeyên civakê rizgar kir pêşkêş kir.
KOBANÊ
Li bajarê Kobanê Yekîtiya Jinên Ciwan bi coşeke mezin pêşwaziya Roja Cîhanî ya Jinên Kedkar 8’ê Adarê kirin.
Îro Yekîtiya Jinên Ciwan li xeta Şerqî ya girêdayî navçeya Şêran li Kobanê bi boneya 8’ê Adarê meşek bi arabeyan li dar xist. Çalakiya jinên ciwan bi beşdariya girseyeke ji gelên navçeyê xwe mezin kir.
Herî dawî li ser navê Yekîtiya Jinên Ciwan Ferîde axafî û got; ” Em cejna hemû jinan pîroz dikin, emê hemû rojên xwe bikin 8’ê Adarê û emê têkoşîna xwe di 8’ê Adarê de bighînin lûtkeyê.
