BEHDÎNAN – Koordînasyona KJK’ê bi daxuyaniyekê berxwedana ku 8’ê Adarê, Roja Jinên Kedkar a Cîhanê de derketî holê slav kir.
Daxuyaniya Koordînasyona KJK’ê wiha ye:
”Jinên Kurdistanî ku her cure êrîşên faşîzmê şikandin û berxwedan di asta herî jor de gihandin 8’ê Adarê, bi berxwedana xwe ya bêhempa ji her kesî re bûne hêvî û wêrekî. Jinên Kurdistanî ku bi rojan e hemû meydan tije kirin, bi berxwedanê û biryardariya mezin bi ser faşîzmê de çûne, mane, rih û xisletekî dî yê têkoşînê dane 8’ê Adarê. Em helwesta têkoşînê ya vê salê ya jinan ku daxwaz nakin lê hesab dipirsin, îdîaya paşerojê datînin holê û ji ya berdest dibihurin pîroz dikin û slav dikin.
Slav li wê raperîna bêhempa ya jinan ku bi coşiya xwe moraleke mezin dane, bi rawesta li berxwedanê azweriya têkoşînê civakî kirine, bi rengên xwe cih li yekrengiyê teng kirine. Slav li wan jinên wêrek û berxwedêr ku bi gotinên xwe bendên faşîzmê hilweşandin, bi lîlan û helwesta xwe qad tije kirin. Slav li wan jinan ku li Wanê bi coşiyeke mezin bûne xwedî helwest, li Silopya bi gotina xwe û çanda xwe rih dane Botane. Slav li wan jinên Kurd, Ereb, Sûryan, Ermen, Azerî ku li Rojava bi coşiya şoreşê li hemû bajaran bûne lehî û ji idyarê şoreşê peyam dane hemû cîhanê. Slav li wan jian ku li Mexmûr, Şengalê bi rawesta li jiyana azad li ber xwe didin, li wan jinên li Tebqa, Minbic, Heleb û Şehbayê bi reng û çandên xwe yên cihê daxwaza azadiyê bilind kirin. Slav jinên Kurdistanî û Tirkiyeyî ku li Stenbol, Izmîr, li gelek deverên Tirkiyê li dijî faşîzm û hişmendiya dewletî ya nêr bi helwesta têkoşîna hevpar rabûn.
Li Kurdistanê, Rojhilata Navîn, Ukrayna û gelek deverên cîhanê, tundiya dewletî ya nêr bi hemû lezbûna xwe dikuje, di pêvajoyeke wiha de helwesta têkoşînê ya inê ku di Roja Jinan a Cîhanî 8’ê Adarê de derketî holê, bi wesfekî wiha ye ku wê qedera sedsalê diyar bike. Jinên ku li her devera cîhanê rabûne ser xwe, pergala nêr a serwer dane ber pirsan, mehkûm kirin û nîşanî cîhanê dan ku ,’bi pêşengiya jinan cîhaneke dî pêkan e’ vîzyona polîtîk a paşerojê jî diyar kirine.
Di serî de jin, jinên Rojhilata Navîn û ji gelên cîhanê bûne yek deng û qaqibo li polîtîkayen nêr ên dewletê kirine, ev jî destpêka serdema bi pêşengiya jinê ye. Têkoşîna ku li Roja Jinan a Cîhanî mezin bûyî û azaweriya azadiyê her wiha xeta têkoşînê ya pêvajoya li pêş me diyar kiriye.
Li çar parçeyên Kurdistanê û li derî welat jinên Kurdistanî ku gavekê jî ji berxwedanê nemane, bi vê 8’ê Adarê re di serî de li faşîzma AKP-MHP’ê, bersiz herî zelal li meydanan dane hişmendiya zilamserwer a dijminatiyê li jinan û gelan dike. Jinan bi çand, huner, helwesta polîtîk, bi bîreweriya xweparastinê û têkoşîna xwe şanî her kesî dane ku stranên wan ên ku bistrînin û paşerojeke wan a ku ava bikin heye. Bi asteke ku ji ya hemû deman geştir, li dijî polîtîkayên faşîzmê û zayendîparêz qaqibo kirine, bi milyonan jinên ku xwe berdane meydanan asta tekoşîna salê danîne holê.
Em wan hemû jinan, bi kelecanî û baweriya ji helwesta têkoşîna jinan careke dî pîroz dikin ku bi rojan e her dever bi cihêtî û rengiya jinê xemilandine, bi berxwedana jinê rakirine ser piyan, bi dirûşma ,”Dema azadiya jinê ye” zindîbûna biharê di civakê gerandin e. Rawestîna jina na li ser azadiyê berpirsyariyên mezin li ser me û hemû tevgerên jinan bar dike. Em careke dî son dixwin bi vê bîreweriya berpirsyariyê bi îdîayeke mezin û biryardarî bi her astê pêşengiyê li têkoşîna jinan bikin ku bûye xwedî asteke civakî.
Jin pêşengiyê li têkoşîna civakî dikin,em bwer dikin helwesta têkoşînê ya jinan ku 8’ê Adarê danîn holê li roja berxwedana civakî Newrozê bi pêşengiya jinan wê wê civakî bibe û bigihije asta xwe ya herî bilind. Bi vê çarçoweyê, di serî de jin û ciwan ji niha ve banga li tevahiya gelê me dikin ku bi rengekî xurt û îdîa tevlî Newroza îsla bibin û hesabê dîrokî ji faşîzmê bipirsin.”