Gelek caran em li ser dijminahiya serokê rejîma Tirk Recep Tayyîp Erdogan û siyasetên rejîma wî ya faşîst û ya dijberî têkoşîna jinên azad û mafên wan, dinivîsin. Pirî caran jî em qala diyardeya tundiyê û sûcên kuştinê yên li dijî jinên li Tirkiyê dikin. Di gelek boneyan de em tekez dikin ku kiryar û siyasetên şaş û yên derexlaqî yên rejîma Erdogan li dijî jinan li Tirkiyê û nebûna azadiya siyasî, sedema yekem û sereke ye ku jin rastî tundiyê û binpêkirinên mafên mirovan tên.
Hedefgirtina jinan û têkoşîna wan di dema niha de bûye armanca sereke ya Erdogan. Wekî min berê jî bi bîr xistibû, bi taybet jinên ku têkoşîna azadî û jiyana birûmet dimeşînin û li hember siyasetên desthildarî û hegemoniyê yên zihniyeta baviksalar li ser jinan û civakê ferz dikin, disekinin, dibin hedef. Serokê rejîma Tirk Recep Tayyîp Erdogan û rejîma wî ya faşîst li Tirkiye, Iraq, Sûriyê û li her deverê jinan hedef digirin û her tim hewl didin kedê wan vala derxin û destkeftiyên bi dest dixin, têk bibin. Nexasim, ew jinên pêşeng ên ku karîbûn ji destpêka tevgera gel ve li hemû qadên jiyanê li herêmên Bakur û Rojhilatê Sûriyê, xwe bi rêxistin bikin.
Haya her kesî jê heye ku jinên Bakur û Rojhilatê Sûriyê ji destpêka tevgera gel li Sûriyê ve karîbûn roleke mezin di bilindkirina têkoşîna şoreşgerî de bilîzin, xwe bi rêxistin bikin û saziyên xwe yên taybet ava bikin, wekî navendên perwerdeyê, komîteyên hiqûqî, rêxistinên sivîl, navendên jinûve amadekirinê û gelek destkeftiyên din. Ji bo wê yekê bikin, jinên ji pêkhateyên Kurd, Ereb û Suryan destê xwe dan hev. Ji van destkeftiyan, avakirina pergala parastinê ya bi navê Yekîneyên Parastin Jin (YPJ) bû ku ji bona jinên herêmê pêşengî kir, rastî eleqeyeke mezin hat û bi hejmarên mezin jinên ciwan tev lê bûn. Van yekîneyan di şerê li dijî terorê de ku li ser herêmê û cîhanê tevahî xeter bû, roleke sereke list. Bi wê ykê, jinan karîbû têgeheke nû ji bo jiyana azad biafirînin. Ev yek ne tenê ji bo herêmê bû lê belê vê destkeftiya dîrokî û gava bêhempa li cîhanê jî deng veda. Gelek mînakên bi vî rengî yên nayên jimartin, hene.
Li bajarê Kobanê yê Sûriyê, beriya 8 salan di şerê li dijî terora DAIŞ`ê de, Yekîneyên Parastina Jin çavê DAIŞ`ê ku hewl da bajêr dagir bike, şikand. Wan şervanên jin li hember êrişên hov ên DAIŞ`ê,berxwendaneke efsanewî ku nimûneyên wê di dîroka mirovahiyê de nîn in, raber kir û DAIŞ têk bir. Bi wê yekê, bi berxwedana xwe ya dîrokî efsaneyên lehengî û fedekariyê nivîsandin. Îroj, piştî ku ji bo mirovahiyê tevahî ew şer kirin, ji aliyê sponserê terorê, heval û hevalbendên DAIŞ`ê, Erdogan ve rastî êriş û hedefgirtinên sîstematîk tên. Erdogan ê ku bi hemû rê û rêbazên dermirovî hewl dide DAIŞ`ê li herêmê vejîne û zindî bike û têkoşîna bi zend û bendên jinên birêxistinkirî tê meşandin, têk bibe.
Çeteyên DAIŞ`ê ku dijminên jinan in, naxwazin bi destê wan bên kuştin, ji ber tirsa ji jinan heta naxwazin dengê wan jî bibihîsin, eger bi destê wan jinan bên kuştin jî nakevin cinetê. Erdogan jî heman kiryar û sûcan li dijî jinên pêşeng pêk tîne.
Rojane, li pêş çavên cîhanê, balafirên bêmirov ên biçek ên dewleta Tirk a dagirker wan şervanên jin ên Kurd ên erdê xwe û herêmê diparêzin hedef digirin, bêyî ku tu deng ji cîhanê derkeve. Me dît çawa keşfên biçek ên dagirkeriya Tirk şervanên YPJ`ê li bajarê Kobanê hedef girtin û şehîd xistin. Piştre fermandara YPJ`ê û fermandara Yekîneyên Antî-Teror Jiyan Tolhildan hat hedefgirtin. Beriya wê bi salekê jî fermandara YPJ`ê Sosin Bîrhat di êrişa balafira biçek a Tirkiyê ya li djiî baregeha leşkerî de li bajarê Til Temirê tevî komek hevalên xwe şehîd bû, ku roja înê salvegera şehadeta wê ye. Lîsteya hedefgirtinan hîna jî dirêj dibe..
Fermandar Sosin Bîrhat piraniya temenê xwe di oxira rêwîtiya azadî, jiyan, edalet û rûmetê de bihurand û ji bo azadiya jinan û azadiya hemû gelên Sûriyê tiştê herî giranbiha feda kir. Nexasim ku wê di nava refên Hêzên Sûriya Demokratîk de cih digirt.
Fermandar Sosin Bîrhat ji beriya gelek salan ve tev li têkoşîna şoreşgerî ya li Rojava bû. Beşdarî gelek şerên li dijî terorê li herêmê bû û ji bo pêkanîna aramî, îstiqrar û ewlehiyê hewldanên dilsoz û wêrek da. Ew her tim li refên pêş bû û bi pêşengî û îsrara xwe bû şervan û fermandara xwedî rola pêşeng di vê jiyanê de.
Sosin Bîrhat, bi ruhê hevrêtiyê di nava hemû hevalên jin û xort de hat nasîn. Erdogan djiminê jinan û têkoşîna jinan, bi zanabûn û ji bo tunekirina têkoşîna jinan a ji bo azadî û jiyana rûmet, Sosin Bîrhat hedef girt. Ji ber ku Erdogan û sîstema wî ya faşîst azadiyê û jiyana bi rûmet ji gelên bindest re naxwaze. Bi taybet li dijî jinên azad in, ji ber ku li ser rejîma wî ya faşîst û zihniyeta wî ya nîjadperest ku yên din qebûl nake û tunekirina jinan û têkoşîna wan esas digire, xeteriyê çêdikin. Ji ber wê ye ku jin hêzeke sereke ya rêveberiya civakê û pêşketina wê ne.
Sosin, fermandar û şoreşgera Kurd ya bi têkoşîn, lehengî û berxwedaniya xwe ya bê westan dihat nasîn, bû semboleke nû ya jinên azad û hemû jinên şoreşger ên li ser rêça wê û rêça bi sedan jinên ku ji bo ala azadiyê li ba bibe û hemû jin bi aramî û azadiyeke bêdawî bijîn, şehîd bûne, dimeşin.
Bi şehadetên wekî fermandar Sosin Bîrhat, ruhê berxwedan, têkoşîn û biryardariyê yê hemiyan nû dibe, da ku rêwîtiya jiyana azad a hevrê şehîd Sosin û bi hezaran hevrêyên wê bi rê ve birine, dewam bikin û bersiva êrişên rejîma faşîst a Erdogan bidin û têk bibin. Bêguman, ev yek bi xurtkirina rola jinan di sîstema parastinê (YPJ) de ku li herêmê ava bûye û beşdariya têkoşîna efsanewî ya ku îro jinên Bakur û Rojhilatê Sûriyê pêşengiyê jê re dikin û belavkirina nimûneya têkoşîna demokratîk, dîplomatîk, siyasî, civakî û çandî ya ku jin li vê cografiya biçûk bi rêve dibin, li seranserê Sûriyê û Rojhilata Navîn, pêkan e. Bi vê yekê dê rê li hemû hewldanên astengkirina têkoşîna jinên azad û hedefgirtina hebûna wê û mafên wê yên jiyanê, bigire. Her wisa bi tunekirina zihniyeta baviksalarî pêkan e, ya ku hewl dide nasnameya rastîn a jinan tune bike, rola wê ya aktîv di civakê de qels bike. Dîsa bi teyisandina têgeha têkoşîna demokratîk û civaka azad û mayînekirina pîvanên jiyana azad û bi rûmet, pêkan e.
Hêvîdar Xalid Nivîsandiye….
