HESEKÊ – Merasîma oxirkirina 9 şehîdên YAT’ê piştî merasîma leşkerî û radestkirina wesîqeyên şehadê ji bo malbatan, bi axaftinan dom kir.
Axaftina destpêkê ji aliyê Fermandarê Giştî yê Hêzên Sûriyeya Demokratîk (QSD) Mazlum Ebdî ve hat kirin.
Mazlum Ebdî, sersaxî li hemû malbatên şehîdan û malbatên 9 şervanên YAT`ê xwest û da zanîn ku wekî hevalên şehîdan bi wan serbilindin. Ebdî hîtabî malbatên 9 şervanan kir û got: “Bi zarokên xwe biserbilind bin”.
Mazlum Ebdî, di berdewamiya axaftina xwe de ev tişt anîn ziman: “Ser navê Fermandariya QSD`ê em tevahî gel, dostên xwe yên îro li vir amade ne û êşa me parve dikin silav dikin. Di bûyera şahadetê de gelek dostên me li gel me sekinîn, bi me re bûn alîkar ku şehîdên me heya vir bi me re anîn. Em wan spasiya wan jî dikin. Îro em li vir fermandarên YAT`ê Şervan Kobanê û 8 hevalên wî yên qehreman oxir dikin. 9 qehremanên şoreşa Rojava, pêşengên QSD û gelên me yên pêşengtiya şerê terorê dikirin oxir dikin; 9 ciwanên çeleng û fedekarên xwe birê dikin. Bi vê munasebetê wekî tevahî şehîdên me ew jî ji me re bûne mînak û rêber, girêdana me xurttir kirin. Li ser vî esasî em ê girêdana xwe xurtir bikin. Xebatên ku ew tê de cih digirtin em ê teqez bi serbixînin.”
https://youtu.be/N77IOLyBfPM
https://www.youtube.com/watch?v=5Vp3FAazINE
BANGA JI BO CIWANAN
Mazlum Ebdî, anî ziman ku ewê heya dawî deskeftiyên şoreşa Rojavayê Kurdistanê û gelên Bakur û Rojhilatê Suriyeyê biparêzin û wiha dom kir: “Em ê saziyên xwe yên leşkerî heya dawî biparêzin da ku heza me QSD û tevahî saziyên me bigihîjin astekê tu carî têk neçe. Wê QSD`ê tu carî têk neçe. Bi vê mûnasebeta bi êş di huzura şehîdên ciwanên gelê me de em bang li hemû ciwanan û pêkhateyên herêmê dikin ku tevlî hêza me YAT`ê bibin û em destkeftiyên şoreşa xwe li dijî dijminan biparêzin.”
https://youtu.be/itXiezLrwPg
`HEYA SERKEFTINÊ WÊ EV AL BILIND BE`
Mazlum Ebdî axaftina xwe bi van gotinan bi dawî kir: “Wê ala Şehîd Şervan û 8 hevalên wî tu carî nekeve û wê di destê hevalên wan de be. Wê ev al heya serkeftinê bilind bibe. Şehîd namirin.”
Merasîm bi axaftinan didome.
Piştî axaftina Fermandarê Giştî yê Hêzên Sûriya Demokratîk (QSD) Mazlûm Ebdî, Hevserokê Meclisa Rêveber a Rêveberiya Xweser Ebid Hamid El Mihbaş, Hevseroka MSD`ê Emîne Omer, Hevseroka Meclisa Malbatên Şehîdan a herêma Cizîrê Selma Xelîl û Nûnerê Kongra Îslama Demorkatîk Mela Ebdurheman Bedirxan axivîn.
El Mihbaş anî ziman ku şehadeta 9 şervanên YAT`ê ji bo wan, malbat û hevrêyên şehîdan windahiyek mezin e û wiha dom kir : “Ey şehîd, we rêwîtiya xwe ya têkoşînê di nava YAT`ê de bi şehadetê bi dawî kir. Şerê we li dijî terorê dest pê kiriye, hîna bi dawî nebûye, ev şerekî çarenûsî ye, şerê parastina ax û gelê Sûriyeyê ye.”
El Mihbaş bal kişand ser fedakariyên şehîdan û rola wan di rizgarkirina herêmên Bakur û Rojhilatê Sûriyeyê û têkoşîna li dijî terorê de û soz da ku ew ê destkeftiyên bi xwîna şehîdan hatine bidestxistin, biparêzin û herêmên dagirkirî rizgar bikin.
Emîne Omer ji ber şehadeta 9 şervanên YAT`ê ji gelê herêmê, Fermandarê Giştî QSD`ê û malbatên şehîdan re sersaxî xwest.
Emîne diyar kir ku wan şehîdan di temenekî ciwan de jiyana xwe kirin oxira doza ku pê bawer kirine, herêm û gelên xwe parastin û fedakariyên mezin dan.
Emîne soza da şehîdan ku ew ê destkeftiyên wan biparêzin û rêwîtiya wan a şeref û rûmetê dewam bikin.
Emîna di axaftina xwe de, komkujiya şeva 21`ê Adarê li Cindirêsê pêk hatiye şermezar kir û sersaxî da malbatên şehîdên Newrozê û got: “Ev sûc bêexlaqiya dagirkeran nîşan dide. Em bang li civaka navneteweyî dikin ku dawî li dagirkeriya li Efrînê bîne. Her wiha bang li tevahî hêzên sûriyeyî kir helwesta xwe bikin da ku gelê Efrînê ji vê zilm û dagirkeriyê xilas bikin. »
Selma Xelîl jî li ser navê malbatên şehîdan axivî, şehîdên YAT`ê, şehîdên hefteya qehremaniyê û tevahî cangoriyên azadiyê bi bîr anîn.
Selma soz da ku ew ê têkoşîna hevalên şehîd bigihînin dawî û dê çeka wan li erdê nehêlin.
Mela Ebdurheman Bedirxan jî diyar kir ku dê tu kes nikaribe agirê azadiyê vemirîne û got: “Heta dayikek, zarokek, heta yek ji me li ser rûyê erdê bimîne, ev agir wê venemire. Em hene, em ê hebin.”
