NAVENDA NÛÇEYAN – Dema ku em li dîroka xwe ya nêz dinerin em li rast gelek rûdanên girîng tên. Yek ji van jî Berxwedana Rojiya Mirinê ya Mezin a 14’ê Tîrmehê ye.
4 kadroyên pêşeng ên tevgera azadiya Kurdistanê, Xeyrî Durmuş, Kemal Pîr, Akîf Yilmaz û Alî Çîçek 14’ê Tîrmeha sala 1982’an li dijî cuntaya faşîst a Dewleta Tirk ketin rojiya mirinê. Mehmet Xeyrî Durmuş, Kadroyê pêşeng ê berxwedana mezin a 14’ê Tîrmehê. Sala 1955’an li gundê Qumik ê Depê hat dinê. Dibistana Seretayî, navîn û amadeyî li Çewlikê qedand û piştre li Zanîngeha Enqererê beşa doktoriyê qezenc kir. Di temenê xwe yê ciwan de fikrên şoreşgerî nas kir. Dawiya sala 1975’an, koma şoreşger a Rêber Apo pêşengiya wê dikir û piştre veguherî PKKê naskir.
Sala 1977’an jî bi temamî dev ji dibistanê berda û bi awayekî profesyonel dest bi şoreşgeriyê kir. Li Çewlik, Amed, Mêrdin û Riha xebatên şoreşê meşandin. 27’ê Mijdara 1978’an tevlî kongreya damezrandina PKKê bû û di amadekirina bernameya partiyê de bi roleke giring rabû..
Sala 1979’an hat girtin û li zindana Amedê li dijî zilma cuntaya faşîst serî hilda. Pêşengiya berxwedana mezin a 14’ê Tîrmehê kir û di roja 55’an de tevlî karwanê şehîdan bû.. Beriya şehîd bibe Xeyrî ev wesyit kiribû:
Li ser kêla gora min binivîsin, deyindarê gelê xwe ye..
KEMAL PÎR LI GIRTÎGEHA AMEDÊ ŞOREŞGEREKÎ ENTERNASYONALÎST
Sala 1952’an li gundê Guzeloluk ê navçeya Gumuşhane Torulê hat dinê. Dema li zanîngeha Enqerê beşa ziman û dîrokê dixwend, Abdullah Ocalan nas kir.
Sala 1976’an li ser biryara Vegera welat, Kemal berê xwe dide bajarên Kurdistanê. Piştî ku PKK’ê biryara derketina derveyî welat dide, Kemal sala 1979’an diçe qada Filîstînê. Sala 1980’î dema careke din vedigere Kurdistanê, tê girtin.
Li zindana Amedê dibe yek ji pêşengên berxwedana li dijî faşîzmê..
14’ê Tîrmehê dema Xeyrî Durmuş detspêkirina çalakiya rojiya mirinê radighîne, Kemal Pîr biryara tevlîbûnê dide. Roja 7’ê Îlona sala 1982’an tevlî karwanê şehîda dibe.
AKÎF YILMAZ BERXWEDÊRÊ DILNIZM Ê 14’Ê TÎRMEHÊ
Sala 1956’an li gundê Beşîktaş yê Erdexanê hat dinê. Ji ber rewşa aboriya xerab a malbatê, Akif bi neçarî dibistana amadeyî di nîvî de dihêle û dest bi xebatê dike.
Sala 1976’an dema li bajarên Tirkiyê kar dikir, tevgera Apoyî nas dike û biryarê dide ku tevlî têkoşîna azadiya gelê Kurd bibe. Di nava salên 1978-1979’an de li Qersê û derdora wê xebatên şoreşê birêve dibe..
Piştre jî diçe Amedê û li wir tê girtin..Li dijî faşîzma cuntaya Tirk, li gel Xeyrî Durmuş û Kemal Pîr tevlî berxwedana mezin a 14ê Tîrmehê dibe.
Û 15’ê Îlona sala 1982’an de şehîd dibe.
ALÎ ÇÎÇEK BERXWEDÊRÊ CIWAN ‘STÊRKA SOR’
Sala 1961’an li navçeya Riha Hîlwanê ji dayîk dibe. Di zaroktiyê de tevgera azadiyê nas dike…û di 16 saliya xwe de tê girtin. Mîna gelek hevalên xwe yên din, li zindana Amedê tê girtin. Ji ber ciwanî û çalakbûyîna wî, li zindanê jê re digotin Stêrka Sor. Li hemberî hemû êşkence û zilmê, ti carî dev ji tekoşîn û berxwedanê berneda.
14’ê Tîrmehê dema beşdarî doza PKK’ê ya Rihayê bû, biryarê dide ku li gel Xeyrî, Kemal û Akif beşdarî çalakiya mezin a rojiya mirinê bibe..
Alî 17’ê Îlonê bû şehîdê dawî yê berxwedana 14’ê Tîrmehê.