NAVENDA NÛÇEYAN- Navenda Ragihandinê ya Yekîneyên Parastina Jin (YPJ) bi daxuyaniyeke nivîskî têkildarî çalakiyên xwe yên tolhildanê agahî parve kirin. YPJ’ê da zanîn ku çalakiyên wan ji bo tolhildana şehîd Sorxwîn Rojhilat û şehîd Azadî Dêrik li dar ketine û di ancamê de 9 çete û leşkerên dagirker hatine kuştin, her wiha 8 çete û leşker jî birîndar bûne.
Di daxuyaniyê de hate gotin: “Yekîneyên me di çarçoveya mafê xwe yê parastinê de û ji bo tolhildana şehîdên xwe yên gazî fermandar Sorxwîn Rojhilat û Azadî Dêrik li seranserê herêma bakur-rojhilatê Sûriyeyê rêzeçalakî li dar xistin. Di van çalakiyan de baregeh û çeperên dagirkeriya Tirk û çeteyên wê hatin hedefgirtin.”
Di berdewamê de hate diyarkirin ku 12’ê Sibatê şervanên wan li herêma Minbicê li eniya Seyyadê ya gundê Hemrat çalakiyeke serdegirtinê li dar xistiye û baregeheke dagirkeran bi temamî hatiye îmhakirin, leşker û çeteyên tê de baregeha xwe berdaye û reviyane.
Têkildarî wê çalakiyê ev agahî hatin parvekirin: “Di encamê de 3 çete di hundirê baregehê de hatin kuştin, 3 çete jî dema hewl dan birevin, ji aliyên şervanên me ve hatin kuştin. Şervanên me çûn ser cenazeyên 3 çeteyên dagirker. Di encama vê çalakiyê de 6 çete hatin kuştin, 3 çete jî birîndar bûn û reviyan.”
Li gorî daxuyaniyê heman rojê li eniya Til Temir-Sewama Aliya ya di navbera gundên Rêhaniyê û Sûsa de şervanên wan bi çekên giran li baregeha leşkerên Tirk ên dagirker daye û 3 leşkerên Tirk ên dagirker hatine kuştin.
Di dewama daxuyaniyê de hate gotin: “Di encama van rêzeçalakiyên me de 9 çete û leşkerên Tirk ên dagirker hatin kuştin. Herî kêm jî 8 çete û leşkerên Tirk ên dagirker birîndar bûn.”
‘EM TOLA ŞEHÎDÊN XWE LI ERDÊ NAHÊLIN’
YPJ’ê her wiha diyar kir: “Wek Yekîneyên Parastina Jin me soz da tevahî jinan û gelê xwe ku em ê tola şehîdên xwe li erdê nehêlin û wê êrişên dagirkeran bê hesab nemînin. Çawa ku me got YPJ hêza tolhildana sedsalê ye, em careke din diyar dikin ku li dijî her cure êrişên dagirkerî û dij-mirovî, em ê hesab ji dagirkeran bixwazin û bersiva pêwîst bidin. Heya avakirina siberojeke azad û ewle, em ê têkoşîna xwe ya azadiyê bidomînin.”
