NAVENDA NÛÇEYAN – Kurdistanî bi awayekî xurt beşdarî meşên 1’ê Gulanê Roja Karker û Kedkaran bûn ku bi banga sendîkayên ji Ewropayê hatin lidarxistin. Di çalakiyên ku li welatên weke Elmanya, Fransa û Awûstûryayê hatin lidarxistin de, banga tevlîbûna çalak a pêngava “Ji Rêber APO re azadî, Çareseriya Pirsgirêka Kurd” hate kirin.
Her wiha bi pêşengiya tevgerên ciwanên Kurd ên li Ewropayê, TCŞ (Tevgera Ciwanên Şoreşger) û TekoJIN (Jinên Ciwan ên Têkoşer) çalakî hatin lidarxistin.
Bellinzona (Swîsrê)
1’ê Gulanê Cejna Karker û Kedkaran li Bellînzona paytexta Ticînoyê bi pêşengiya ciwanên Tevgera Ciwanên Şoreşger (TCŞ) û Jinên Ciwan ên Têkoşer (TekoJIN) bi komên çep ên sosyalîst bi meşekê hat pîrozkirin.
Girseya gel li stasyona trenê ya Bellînzona li hev civiya û li navenda bajêr meşa xwe berdewam kir.
Dostên gelê Kurd jî piştgirî dan meşa bi pêşengiya ciwanên Kurd. Di meşê de bi sedan belavokên danasîna pêngava “Ji Rêber APO re Azadî, Çareseriya Pirsgirêka Kurd” ji aliyê ciwanan ve li şêniyên Bellînzona hatin belavkirin. Tevî barana zêde jî 1’ê Gulanê ji aliyê girseyê ve bû şahidê kêliyên bi coş.
Di meşê de dirûşmên “Bijî Partîya Karkerên Kurdîstan”, “Bijî Serok Apo”, “Be Serok Jîyan Nabe”, “Ciwan Fedayî ji Reber Apo re” û “Em hemû PKK ne” bi zimanê Îtalî hatin vekirin. Ciwanan li pêşiya meşê pankartên “1’ê Gulanê û PKK’ê” hilgirtin.
Çalakiya 1’ê Gulanê ku bi coş hate pîrozkirin, li qada 1’ê Gulanê bi çepikan bi dawî bû.
Basel (Swîsrê)
Li bajarê Basel bi wesîleya 1’ê Gulanê Roja Karkerên Cîhanê zêdeyî hezar kes hatin cem hev.
Bi dehan rêxistinên sivîl, komele û partiyên siyasî beşdarî pîrozbahiyên ku bi pêşengiya UNIA (rêxistineke sivîl a li Swîsreyê dixebite) hatin lidarxistin. Pîrozbahiya ku Komeleya Çanda Kurd a Baselê jî beşdar bû, li qada Basel Messeplatzê bi kombûnê destpê kir.
Girseya ku li Messeplatzê dest bi meşê kir, piştî saetekê gihişt qada xwepêşandanê ya li Qada Barfî ya Baselê.
Di şahiyê de şanoyên ku ji aliyê koma folklorê ya Dem û koma muzîkjenên Kurd ve hatibûn amadekirin hatin lidarxistin. Pîrozbahî bi xwepêşandanên ku ji aliyê sazî û rêxistinên cuda ve hatibûn organîzekirin bi dawî bû.
Reims (Fransa)
Bi pêşengiya TCŞ’ê Kurdistaniyan 1’ê Gulanê bi meşekê pîroz kirin. Çalakiya ku saet di 10:00 de li Maison Régionale Des Syndicats destpê kir, saet di 12:00 de li ber avahiya şaredariyê bi daxuyaniya çapemeniyê bi dawî bû.
Di meşa ku li qadên qelebalix ên bajêr dewam kir de, dowîz, pankart û belavokên azadiya fîzîkî ya Rêber APO xwestin hatin hilgirtin. Di tevahiya meşê de ciwan û Kurdistanî gelek caran bê navber siloganên “Bijî 1 Gulan” û “Bijî Serok APO” berz kirin.
Di çalakiyê de pankartên bi boneya 1’ê Gulanê Cejna Karker û Karkeran hatin hilgirtin. Di çalakiya ku li ber avahiya şaredariyê bi daxuyaniyeke çapemeniyê bi dawî bû, bal hate kişandin ser azadiya fîzîkî ya Rêber APO. Axaftin û daxuyaniyên hatin dayîn; Hat destnîşankirin ku 1’ê Gulanê roja ku hemû kedkar û gelên li dijî zilmê têdikoşin bi hev re bibin yek û daxwazên xwe yên azadiyê bînin ziman. Pîrozbahiya 1’ê Gulanê bi dirûşme û sirûdan bi dawî bû.
Dûsseldorf (Elmanya)
1’ê Gulanê Cejna Karker û Kedkaran li bajarê Elmanya Dusseldorfê bi beşdariya ciwanên endamên TCŞ’ê, TekoJIN’ê û gelek saziyan bi heybet hat pîrozkirin.
Di çarçoveya pêngava “Azadî ji Rêber APO re, Çareseriya Pirsgirêka Kurd” di meşê de dirûşmeyên piştgiriya berxwedana gerîla hatin qîrîn û pankart hatin hilgirtin, azadiya fîzîkî ya Rêber APO hate qîrîn. Di meşê de timî dirûşmên “Bijî Serok APO” û “Bijî 1 Gulan” hatin berzkirin. Meşê ji stasyona trenê ya navendî dest pê kir û heta Johaanes-Rau-Platzê berdewam kir. Di meşê de wêneyên rengîn derketin holê.
Çalakî bi dirûşmeya ciwanan bi dawî bû.
