NAVENDA NÛÇEYAN- Rêveberiya Xweseriya Demokratîk a Herêma Bakur û Rojhilatê Sûriyeyê der barê hemleyên girtin û çewisandinê yên li dijî Sûriyeyiyên li herêmên dagirkirî û li Tirkiyeyê pêk tên de daxuyaniyek da.
Daxuyanî wiha ye:
“Em hemleyên girtin û bindestiyê yên ku li herêmên dagirkirî û li Tirkiyê bi destê hêz û îstixbarata Tirkiyê li dijî gelê Sûriyeyê tên kirin, şermezar dikin . Em ji malbatên qurbaniyên ku ji aliyê artêşa Tirk ve hatine qetilkirin re sersaxiyê dixwazin û ji birîndaran re jî şifayê dixwazin, her wiha em dengê xwe li dengê hemû Sûriyeyiyên azad ên ku helwesta xwe li hember siyasetên dijmin, nijadperestî û etnîkî yên ku ji aliyê rayedarên Tirkiyê ve li dijî penaberên Sûriyê û welatiyên Sûriyê yên li herêmên dagirkirî têne meşandin’ tînin ziman. Dewleta Tirk şoreşa Sûriyê rawestand û ji bo krîza Sûriyê ji bo bidestxistina armancên xwe bi kar bîne û penaberên sûriyeyî ber bi Tirkiyê ve bikişîne xebitî. Da ku wan wek kartek zextê li dijî Ewropayê bi kar bîne. Ji aliyekî din ve dewleta Tirk a dagirker ji bo îstismarkirina sûriyeyiyan, gel wek keda erzan bikar anî û ew kişand nav çeteyên mafya û madeyên hişbirê û fuhûşê. Lê piştî ku dewleta Tirk di hemû hewldanên xwe de têk çû û bi ser neket ‘ îro li Tirkiyayê li hember penaberên sûriyeyî êrişan pêk tîne, ji bo bi penaberên sûriyeyî bi darê zorê ji axa xwe re û li herêmên dagirkirî polîtîkaya qirkirina fizîkî û çandî dimeşîne , wek avakirina avahiyên mêtingehiyê û siyaseta qirkirina etnîkî ya li ser gelê Kurd li Efrîn, Serêkaniyê û Girê Spî.
Bûyerên Qeyseriyê û êrişên piştî wê yên li ser penaberên Sûriyeyî, encama siyaseta neteweperest a dewleta Tirk a hovane ya li dijî gelan e. Tişta ku di van rojan de qewimî bi awayekî zelal eşkere bû ku siyaseta dewleta Tirk a li hember aloziya Sûriyê têk çûye û hewldanên Erdogan ên ji bo hevdîtina bi hikûmeta Sûriyeyê re jî delîla wê ye. Lê ev nayê wê wateyê ku dewleta Tirk dev ji stratejiya xwe berdaye û bi vî rengî aramiya Sûriyeyê an jî çareseriyekê ji xwe re dike armanc. Belê ew dixwaze bi destê hikûmeta Sûriyeyê careke din şerekî navxweyî di navbera hêzên Sûriyê de derxe. Ji ber vê yekê em hêvîdar in ku hemû gelê Sûriyeyê di serî de hikûmeta Şamê û hêzên opozîsyonê hişyar bin ku nekevin ew tişta ku berê li sûriyeyê qewimiye. Her wiha, em gelê Sûriyeyê divê bêyî pişta xwe bidin tu hêzekê ji bo çareserkirina pirsgirêkên xwe bixebitin. Diyaloga Sûriyeyî-Sûriyeyî çareya herî guncaw e ku em pirsgirêkên xwe çareser bikin. Hevgirtina me ya hundirîn wê hemû hêzan neçar bike ku serî li daxwazên me bidin û bi wê re jî dewleta Tirk a dagirker ji nava axa xwe derxin.
Di dawiyê de em bang li hemû welatiyên Bakur û Rojhilatê Sûriyeyê dikin ku vegerin herêma Rêveberiya Xweseriya Demokratîk a Herêma Bakur û Rojhilatê Sûriyeyê , ji ber ku ew herêm misogeriya jiyana azad û bi rûmet e. Her wiha em bang li rêxistinên mafên mirovan û navneteweyî yên têkildarî karûbarên penaberan dikin ku komîteyên şopandina rastiyan der barê êrîş û binpêkirinên li dijî sûriyeyiyan li Tirkiyeyê û li herêmên dagirkirî pêk tên bişopînin û belge bikin. Her wiha em bang li hêzên navneteweyî, herêmî û erebî dikin ku siyaseta xwe ya li hember krîza Sûriyeyê ji nû ve di ber çavan re derbas bikin û dest bi qonaxeke nû ya dan û standinan bikin ku hemû aliyên sûriyeyî ji bo çareserkirina krîzê beşdar bin.”
