NAVENDA NUÇEYAN- Navenda Ragihandin û Çapemeniyê ya YPJ’ê bi daxuyaniyêkî nîviskî nasnameya Berçem Kobanê ku di 1’ê Mijdara 2024’an de di encama êrîşa hewayî ya balafirên bêmirov û bi çek a dewleta faşîst ya Tirk de şehîd bû da.
Daxuyanî bi vî rengî ye:
“Şervana me Berçem Kobanê di encama êrîşa hewayî ya balafirên bêmirov û bi çek a dewleta faşîst ya Tirk de gihîşt karwanên şehîdan.
Hevrêya me Zeyneb Mihemed bi nasnav Berçem Kobanê di 1’ê mijdarê, di encama êrîşa hewayî ya dewleta faşîst û dagirker ya Tirk de tevlî karwanên nemiran bû. Em di kesayeta rêhevala xwe Berçem Kobanê de hemû şehîdên şoreşa azadî û mirovahiyê bi rêzdarî û minetdarî bi bîr tînin. Ji mala xwe ya welatparêz û gelê xwe re sersaxî dixwazin.
Şoreşa Rojava bi berdelên mezin û giranbiha hatiye avakirin. Di encama vê têkoşîn û berxwedanê de bi sedan rêhevalên me şehîd bûn. Bi hezaran jî perçeyên ji canê xwe feda kirin û bûn gazî. Herwiha gelên me yên leheng bi hestên welatperweriyê tim xwedî li şoreşa xwe derdikeve û li beramberî her cure êrîşên dagirkerî û komkujiyê berxwedanê pêşdixin. Rêhevala me Berçem ev rastî di temeneke ciwan de hîs kir û bi çîrokên lehengan ên hevalên şehîd û gazî mezin bû. Yek ji bandora herî mezin ku rêhevala me ber bi refên şoreşê ve anî, rastiya şehîdên me yên zindî rêhevalên gazî bû.
Di sala 2021’an de dema ku dewleta faşîst û qirker ya Tirk bi awayekî hovane êrîşên Herêmên Parastina Medya kir û di encama êrîşên kîmyewî de bi gerîlayên azadiya Kurdistanê şehîd bûn, rêhevala me Berçem Kobanê li beramberî rewşa heyî bi hêrs û kîneke mezin sekinî. Wê nedikarî ku vê yekê bipejirîne û ji bo ku tola hemû êrîş û dagirkeriya dewleta faşîst û qirker û çeteyên wî bistîne, bi ruhê berxwedana Kobanê berê xwe da fikir û felsefeya Rêber Apo.
Rêhevala me Berçem li Kobanê di malbateke welatparêz de ji dayik bû. Bi çanda berxwedanê ya ku ji malbatê wergirtî mezin bû û hertim li ser vê bingehê jiya. Di nav şer de mezin bû û bû zarokeke şoreşê. Ji ber vê yekê jî bû şoreşgereke mezin û jineke ciwan a dilwêrek.
Rêhevala me Berçem Kobanê piştî tevlî refên şoreşê bû, demekê di nav kar û xebatên jinên ciwan de cih girt. Bi coş û xwestekeke mezin xebatên rêxistinkirin û perwerdekirina ciwanan meşand. Her tim pêşengiya rêxistinkirina ciwanan bi taybet jî jinên ciwan dikir. Bi qasî girîngî dida perwerdekirina xwe bi fikirên Rêber Apo, herwiha zanînên xwe fêrî ciwanan jî dikir.
Rêhevalê me Berçem Kobanê di jiyanê de bi coş û jîndarbûna xwe dihate naskirin. Li her cihê ku dima jî ev moral û coşa xwe diteyisand. Hewl dida ku nasnameya xwe ya ciwantiyê bi wateya wê ya rast bijî.
Di jiyana xwe de di her mijarê de, ji disîplînê heya şêwaz û tempoyê, ji hizirîn heya pratîkirinê, ji kedkariyê heya bi zaferê re klîdbûn rastiya Rêber Apo esas digirt. Her roj bi ramanên Rêber Apo xwe perwerde dikir û bi vî rengî dest bi roja xwe dikir. Milîtaneke Apoyî ya mînak bû.
Piştî xebatên jinên ciwan, Berçem Kobanê bi tecrûbeyên xwe yên ku wergirtî, beşdarî YPJ’ê bû û di refên me de bi heman taybetmendiyên xwe yên wêrekî, fedakarî, dilnizmî û milîtantiya Apoyî roleke aktîf leyîst. Erk û berpirsyariyên xwe bi awayeke serketî pêk anî û ji hevrêyên xwe re jî bû mînak.
Delweta Tirk a dagirker bi feraseta şovenîst û dagirkeriyê şoreşa Rojava ku şoreşa jinê ye, kiriye hedef. Ji ber ku vîna Kurdên azad, mirovên azad, jinên azad, netewên azad û civakên azad di vê şoreşê de ava dibe û belavê herêmê û cîhanê dibe. Ji ber vê jî ji bo ku şoreşa me têk bibe, êrîşên dûr ji exlaqê mirovahiyê pêk tîne, hemû qaûnên navnetewî binpê dike. Herî zêde jî jinên pêşeng, jinên şoreşger dike hedef. Di 1’ê mijdarê de dewleta dagirker ya Tirk êrîşeke hewayî bi balafira bêmirov û bi çek pêk anî û di vê êrîşê de şervana me Berçem Kobanê şehîd bû.
Di şoreşa azadiyê de bi sedan şervanên me bûn lehengên wek Şîlan, Arîn, Avesta û Barîn. Îro jî di çeperên herî dijwar ên şer de mîrateya şehîdan tê parastin, li beramberê hişmendiya qirêj a zilamê desthilatdar şereke bêmînak tê meşandin.
Em dubare ji malbata hêja ya rêhevala xwe re sersaxî dixwazin û didin diyarkirin ku wek YPJ’ê emê şehîd Berçem Kobanê di têkoşîna xwe de bidin jiyandin û xwedî li bîranîna wê derkevin. Emê xwedî li xewn û xeyalên şehîd Berçem derkevin, ala têkoşînê ku me ji şehîdan dewr girtiye, emê bigihinîn serkeftinê.
Emê tola şehîdên xwe ji hemû dagirker û çeteyên dijminê mirovahiyê hilînin û tola hemû jinên azadîxwaz û têkoşer ku rastê zordarî û tundiyê tên, bi serxistina şoreşa jinê di asta cîhanê de hilînin.
Nasnameya şehîd wiha ye:
Nav û Paşnav: Zeyneb Mihemed
Nasnav: Berçem Kobanê
Navê Dayik: Emîra Mamo
Navê Bav: Mistefa Mihemed
Dîroka Şehadetê: 01.12.2024
