HESEKÊ- Di çarçoveya hemleya seferberiyê de ji aliyê Tevgera Ciwanên Şoreşger ve li Kampa Talayan a ku koçberên Serêkaniyê lê dimînin, perwerdeya çekan ji ciwanan re hate dayîn.
Ciwanan eleqeyeke mezin nîşanî perwerdeyê dan û nêzî 15 ciwan û jinên ciwan tevlî bûn.
Di vê dema krîtîk de ku dewleta Tirk a dagirker û çeteyên wê êrîşên dijwar li ser xaka Bakur û Rojhilatê Sûriyeyê dimeşînin, girîngiya Şerê Gel ê Şoreşger careke din derdikeve holê. Di vê têkoşînê de ku ji 7 salî heta 70 salî divê her kes bi awayekî aktîf tê de bileyize, bêguman erka herî girîng dikeve ser milê ciwanan.
Şervanên QSD, YPG û YPJ’ê derbên mezin li hêzên dagirker dixin û berxwedaneke dîrokî ji aliyê şervanan ve tê nîşandan. Li ser vê bingehê ciwanên Kurd, Ereb, Asûrî û Ermenî jî bi sekna li kêleka cangoriyên azadiyê erka parastina ax û gelê xwe digirin ser milê xwe.
Tevgera Ciwanên Şoreşger dema ji bo girtina tedbîrên ewlekariyê li kolanan û li ser rêyan dixebite, di heman demê de perwerdeya xweparastinê dide ciwanan ku çawa li hember êrîşên muhtemel xwe biparêzin.
Ciwanên ku duh êvarê hatin cem hev li ser vê bingehê perwerdeya çek hat dayîn. Di perwerdeya ku ji aliyê hêzên asayîşê ve hat dayîn de, li ser esasê çi taybetmendiyên çekê çiye, çawaniya vekirin û girtina çekê û çawaniya bikaranîna çekê perwerde hate dayîn. Di qonaxa ewil a perwerdeyê de ciwan dê sibê pratîka xwe bikin.
Koçberê Serêkaniyê Ganem Hemûd ku beşdarî perwerdeyê bû, der barê pêvajoyê de nêrînên xwe ji ajansa me re parve kir.
“Em niha li kampa Talayan in. Tevgera Ciwanên Şoreşger ji bo perwerdehiyê alîkariya me dike. Ji bo alîkariya hevrêyên xwe yên li eniyê şer bikin divê em li hemberî dijmin rawestin û teslîm nebin. Li ser vî esasî em perwerdeyê dibînin.
Niha dewleta Tirk a dagirker hewl dide di navbera Ereb û Kurdan de nakokiyan derxîne. Weke jineke ciwan a Ereb em diyar dikin ku em ê nekeve van hîleyan. Ez bang li hemû hevrêyên me yên Ereb, Kurd û Suryanî dikim ku bi me re li dijî dewleta Tirk a dagirker bimeşin. Ez bang li hemû ciwan û jinên ciwan jî dikim; Li ser esasê xweparastinê xwe perwerde bikin. Em ê teslîm nebin, em ê heta dawiyê li hemberî dijmin bisekinin. Di dawiyê de em bang li hemû êhevalên xwe yên jinên ciwan û ciwan dikin ku tevlî seferberiyê bibin. Werin em li eniyên şer berxwedana xwe mezin bikin.”
Endamê Asayîşa Kampa Talayan Omer Ezîz bi dayîna perwerdeya çekan ji ciwan û jinên ciwan re erkên xwe bi cih tîne.
“Em li kampa Talayan in. Li ser esasê Erka Xweparastinê me dewreya fêrbûna çekan vekir. Îro me dersa vekirin û girtina çekê da. Her wiha dê di demeke nêz de dersa bikaranîna çekan jî were dayîn. Li ser vê bingehê em li her derê li dijî êrîşên çeteyên dewleta Tirk a dagirker destekê didin hevrêyên xwe. Em bang li hevrêyên xwe dikin, werin tevlî pêngava seferberiyê bibin. Bi beşdariya bi van perwerdeyan ve em dikarin li eniyê şer de gel rêhevalên xwe cîh bigrin.”
