TIŞRÎN – Îro danê nîvro li bajarê Heseke li dijî êrîşên dewleta Tirk li ser nobedê gel li Tişrînê meşekî girseyî hat lidarxistin. Bi hezaran şeniyên Heseke û koçberên herêmên dagirkirî ku li wir bi cih bûne beşdarî meşê bûn.
Meş ji çarxereya îtfayî dest pê kir û li çarxereya Kanîse bi dawî bû. Alên Hêzên Sûriyê Demokratîk hatin hildan û dirûşmeyên şermezarkirina dagirkeriya Tirk û pişgiriya şervanên QSD hatin berzkirin.
Li cem dêrê, xwepêşandan veguherî mîtîngê. Li wir endama Meclisa Malbatên Şehîdan a Hesekê Fatme Elî axivî û behsa fedakarî û lehengiyên QSD`ê kir û got: “Îro, ji bo ku gelê herêmê di nava aştiyê û ewlehiyê de bijî, QSDˋê li Bendava Tişrînê destanên lehengiyê dinivîse.”
Fatme wiha domand: “QSD`ê ji bo tunekirina DAIŞ`ê fedakariyên mezin dan. Wê hewldanên dewleta Tirk nikaribin van hêzan bişikînin.”
Hevserokê Meclisa Bajarê Hesekê Farûq Tozo jî wiha axivî: “Beşdariya pêkhateyên herêmê di vê xwepêşandanê de ji bo tevahî cîhanê peyamek e ku QSDˋê parêzvanê rastîn ê tevahî pêkhate û etnîkan e.”
Tozo ev li axaftina xwe zêde kir: “Dewleta Tirk a dagirker dixwaze jiyana şêniyan asteng bike, lewma êriş bendavê dike. Lê QSD`ê parastina herêmê û xelkê wê didomîne.”
Di heman çarçoveyê de Meclisa Bajarê Dirbêsiyê ya kantona Cizîrê daxuyaniyek da raya giştî. Hevserokê meclisê Numan Erebo daxuyanî li pêşiya avahiya meclisa bajêr xwend. Bi dehan şêniyên bajêr û endamên sazî û meclisan tev li çalakiyê bûn.
Di daxuyaniyê de hate diyarkirin ku êrişên dijî welatiyên li Bendava Tişrînê nobedê dikin, binpêkirina pîvanên mirovahiyê ye.
Di daxuyaniyê de bang li rêxistinên hiqûqî û civata navneteweyî hate kirin ku bi erkên xwe yên parastina welatiyan rabin.
Di dawiyê de bang li xelkê Bakur û Rojhilatê Sûriyeyê hat kirin ku ji bo piştgiriya berxwedana QSDˋê, têkbirina êrişên dagirkeriyê û pêkanîna serkeftinê berê xwe bidin qadên berxwedanê.
