NAVENDA NÛÇEYAN – Bi dirûşmeya “Bi rihê şerê gelê şoreşger em xwe bi rêxistin bikin û netewa demokratîk pêk bînin” yekemîn kongreya Rêxistina Ciwanên Partiya Yekîtiya Demokratîk (PYD) li Navenda Çand û Hunerê ya taxa Xiwêran a bajarê Hesekê li dar ket.
Bi sedan ciwanên PYD‘ê, nûnerên Rêveberiya Xweser a Bakur û Rojhilatê Sûriyê, Meclisa Sûriyeya Demokratîk, Meclisa Malbatên Şehîdan, Kongreya Star û rêxistinên ciwanan ên bajarê Hesekê beşdarî kongreyê bûn.
Di salona kongreyê de pankarên “Bi rihê şehîdên Qereçoxê em ê têkoşînê mezin bikin”, “Bi rihê berxwedana girtiyan em ê pergala Îmraliyê têk bibin” û “Bi îradeya ciwanan dê tirêjên azadiyê ji Efrînê hilê” hatibûn daliqandin.
Kongrê bi deqeya rêzgirtina bîranîna şehîdên têkoşîna azadiyê dest pê kir. Paşê Hevseroka Partiya Yekîtiya Demokratîk Eyşe Hiso geşedanên siyasî bi kurtî şîrove kir û bal kişand ku aloziya Sûriyê derbasî sala xwe ya 9‘an bûye, bêyî ku çareserî were peydakirin û got: “Dewletên herêmî û cîhanê yên ku dest di karûbarên Sûriyê de wer didin di nava pêşbaziyê de ne, her dewletek dixwaze temenê aloziyê dirêj bibe da ku li ser hesabê gelê Sûriyê qezenciyan bi dest bixin.”
Eyşe Hiso, nêzîkatiyên rejîma Sûriyê ji aloziyê re rexne kir û diyar kir ku rejîm bi siyaseta xwe ya yekalî ve girêdayî ye, hîna jî girîngî nade jin û ciwanan da ku rola xwe di avakirina Sûriyeya pêşerojê pêk bînin.”
Hevseroka PYD‘ê got: “Di vê pêvajoya girîng de ji me tê xwestin ku em têkoşînê mezin bikin, gel biparêzin û hevgirtina pêkhateyan xurt bikin, bi taybet di navbera ciwanan de. Li aliyekî din jî em komployên li dijî yekîtî û gelê Sûriyê teşhîr bikin û li hemberî wê bisekinin.”
Di berdewama kongreyê de endama Melcisa Malbatên Şehîdan a katona Hesekê Rewa Hisên jî axivî û anî ziman ku bi saya ciwanan pêkhate bûne yek, di çeperên parastina xaka welat de xwîna wan tev li hev bû.
Rewa Hisên got: ” Em malbatên şehîdan bi we re, em soz didin şehîdên xwe ku em şopdarên xeta şehîdan bin heta serkeftin pêk were.”
Rêveberê Tevgera Ciwanên Şoreşger a Sûriyê Sadiq Cûdî jî lidarxistina kongreyê li ciwanan pîroz kir û bang li ciwanan kir ku li hemberî dagirkeriyê têkoşînê mezin bikin.
Piştî axaftinan, senevîzyonek li ser berxwedana çalakgerên ku ji bo rakirina tecrîda li ser Rêberê Gelê Kurd Abdullah Ocalan di grevên birçîbûnê de ne hate pêşandin. Her wiha peyamên pîrozbahiyên hatin xwendin.
Piştre jî xebatên ciwanên PYD‘ê hatin xwendin û pêşbiryar hatin girtin, ji wan “Mezinkirina têkoşînê ji bo azadiya Ocalan û rizgarkirina Efrînê, bilavkirina zanista siyasî li gel ciwanan û piştevaniya bi hêzên YPG, YPJ û QSD‘ê re”.
Di dawiya kongreyê de meclisa rêvebera a rêxistina ciwanên PYD‘ê ya bajarê Hesekê ji 26 endaman hatin hilbijartin. Endamên rêveber dê li herêmên Bakur û Rojhilatê Sûriyê werin belavkirin.
