NAVENDA NÛÇEYAN – KCR’ê piştgirî da serhildanên Rojhilatê Kurdistanê û Îranê û got;”Beşdarbûna her azadîxwazekê li nava rêzên berxwedan û serhildanên demokratîk ên gelên Îran û Rojhilatê Kurdistanê erkekî mirovî û exlaqî ye.”
Komelaya Ciwanên Rojhilatê Kurdistanê (KCR) têkildarî xwepêşandanên Rojhilatê Kurdistanê û Îranê daxuyanî da.
Di daxuyaniyê de wiha tê gotin;”Serhildanên Îran û Rojhilatê Kurdistanê yên ji bo gihîştina jiyanek azad û demokratîk destpêkirine, coşekî kolanan a bi îrade û biryardariya gelên Îranê û Rojhilatê Kurdistanê ya ji bo jiyanek azade. Raperîna li hemberî zilma rejîma dagirker a Îranê ye.
Nêzî 40 salene ev rejîm bi benê sêdarê, girtin, kuştin, bêkarî, giranî û hejariyê bersiva daxwazên rewa yên azadîxwazên Îranê û Rojhilatê Kurdistanê dide.Niha gelên Îranê û Rojhilatê Kurdistanê li dijî zilam, gendelî û dagirkeriya rejîmê daketine qadan. Karbidestên rejîma Îranê ya dagirker tirsandiye, lewma rejîm bi hemû hêza xwe êrişî gel dike. Xwepêşandanên dawî yên bi pêşengiya ciwan û jinên Îran û Rojhilatê Kurdistanê pêk hatine, ev jî tê wateya raperîna serdema ciwan û jinan a li dijî zilm û zarodarî, gendelî, bêkarî, girtin û dagirkeriyê. Beşdarbûna her azadîxwezekê li nava refên berxwedan û serhildanên demokratîk a gelên Îranê û Rojhilatê Kurdistanê erkekî mirovî û exlaqî ye. Ciwan xwe bi rêxistinkirinê û baweriya bi hêza cewherî dikarin agirê serhildanê ji bo gihiştina azadiyê geştir bikin.
KCR’ê bang li tevahiya ciwanên Îran û Rojhilatê Kurdistanê kir ku li dijî siyaseta çewisadin û zilmdar a rejîma Îranê girîngiyê bidin xwe bi rêxistinkirinê û pêşengiyê ji serhildanên demokratîk re bikin û xwedî li destkkeftiyên demokratîk ên gelan û bi taybet gelê Kurd ê Rojhilatê Kurdistanê biparêzin.
