NAVENDA NÛÇEYAN – Hêzên rejîma Îranê duh li ser sînorê navbera Rojhilat û Başûrê Kurdistanê de êrîşê komek kolber kirin. Di encamê de kolberek hatibû kuştin û 9 kolber jî birîndar bibûn. Îro kolberek din yê birîndar jiyana xwe jidest da.
Duh hêzên rejîma Îranê li ser sînorê navbera Rojhilat û Başûrê Kurdistanê ya dikeve herêma Hewraman a ser bi Kirmaşanê, êrîşê komek kolber kirin.
Li gorî agahiyên nûçeya Kolbernewsê, di encama êrîşê de kolberê bi navê Ehmed Sehrayî (24) yê xelkê gundê Dişeî ya ser bi Pawe hatiye kuştin û 9 kolber jî birîndar bûne.
Li gorî heman çavkaniyê îro kolberê bi navê Şahid Edak (22) ku li nexweşxaneya Pawe dihat derman kirin, tevî hemû mûdaxeleyan jî jiyana xwe ji dest daye.
Navê kolberên birîndar bûne wiha ne; “Cebar Mihemedî, Zahir Nurî, Celal Nurî, Taha Silêmanî, Resul Hoşî û Şadman Seyîd” Gorî agahiyan hemu kolberên birîndar bûne xelkê gundê Kelaşî Ciwanro ya ser Kirmaşanê ne.
Hate zanîn ku hemû kolberên birîndar bûne rakirine nexweşxaneya bajarê Pawe ya ser bi Kirmaşanê. Tê gotin birîna hinek ji birîndaran girane. Li gorî dîmenên di tora civakî de belavbûne, gelek welatî ber derê nexweşxaneya Pawe kombibûn û nerazîbûna xwe hemberî hêzên rejîmê anîn ziman.
