HEFTANÎN – Di 16’ê Hezîrana 2020’an dewleta tirk a dagirker bi hemû derfetan êrîşên dagirkeriyê li ser herêma Heftanînê da destpê kirin. Gerîlayên HPG/YJA STAR’ê bi berxwedanî û fedaîtiyek mezin êrîşên dagirkeriyê vala derxistin. Di derbarê Berxwedana Cenga Heftanînê de Kordîneya Cenga Heftanînê Batufa Çekdar nerînên xwe ji ajansa me re parvekir.
Lê wê rojê jî 3 caran ev êrîşên dijmin hatin şikandin û vê pevçûna ku bi gotinan pênaseya wê nayê kirin heta bi seatên şevê dewam kir. Li vê eniyê xeta ş. Dêrsim jina ciwan hevrê Zerya Mahîr a bi xweşikbûna xwe weke hîvê şev ronî dikir bi sekneke milîtaniya jina azad heta guleya xwe ya dawî şerkir û şehîd bû. Dîsa li heman eniyê xeta tûnêlê fermandara fedakar û cewher xweşik hevrê Nûcan Serdoz bi cesareteke mezin û kîna salan bi ser dijmin de çû derbên giran li dijmin dan û li wir giha şehdetê. Dijmin dît ku nikare vîna vê eniya jinên azad û berxwedêr bişikîne. Vê carê bi seatên êvarî re xwe gavekê bi paş de dan û careke din bi dehan balafirên şer bi alîkariya 5 balafirên keşifê rakirin ser vê eniya berxwedanê û bi dehan caran bê navber bost bi bost ev eniya cenga mezin bombebarankirin. Bi vî awayî di van êrîşan de fermandar Esmer, Bêrîvan Cûdî û Araret Melazgirt şehîd bûn cihê xwe di karwanê şehîdên Cenga Heftanîn de girtin.
Berxwedanekê bihizirin ku bi renge jina azad be, cenga şerekî serkeftî bihizirin ku fermandariya wê jina pêşeng a azad be. Biryardariya serkeftineke domdar bihizirin ku pêşengiya wê jina zane ya xwedî îdayên mezin be. Belê ev gotin tam jî kesayet, sekin û taybetmendiyên hevrê fermandar Zelal Sîdem vedibêjin. Heta dikarim bêjim ku gelek caran gotin bê wate dimînin li hember fedakarî û cesareta vê fermandara serkeftî. Lê em careke din wan gotinan tînin û bi ruhê Cenga Zelalan digihînin wateya wê ya rastî. Belê ev fermandara bi coş û kelecana xwe di her kêliya jiyana xwe de ji bo hevrê û şervanên xwe dibû çavkaniya hêzê. Vê fermandara bi ruh û enerjiya xwe ya xweşik rengê jina azad dayî Cenga Heftanîn, salekê fermandariya bîrlika ş. Viyan a jinên azad kir. Û di vê sala oparasyona Heftanîn de jî fermandariya eniya berxwedana Şeşdara-Gelî kir û di fermandariya wê de gelek rêze çalakiyên serkeftî pêşketin. Ew hevrêya Çîçek û Dilovanan bû. Şopdara fermandar Rojîn Gewda û Reşîd Serdaran bû. Lewre wê bi vî ruhî jiyankir, şer kir, hevaltî kir, fermandarî kir. Ew jineke wisa çiyayî bû ku her roj pora xwe bi bahê hênik ê Heftanîn şeh dikir. Rûyê xwe bi tîna tîrêjên rojê duşûşt. Çavên xwe bi xweşikiya xwezaya Geliyê Pisaxa kil dikir û kenê xwe yê xweşik tevlî xweşik-kirina Heftanîn dikir. Her kêliya vê jina zana bi lêgerîna azadiyê û îdaya lidarxistina çalakiyê tejî bû. Lewre di dirêjiya vê sala Cenga Heftanîn de ew her weke fermandara bi îda ya vê berxwedanê hate nasîn. Li cihê fermandar Zelal lê baweriya serkeftinê, ruhê kolektîf ê hevaltiya PKK ê, sekna jina azad û pêşengtiya jina zana hebû. Ji niha û şûn ve jî wê ev hevrê û fermandara delal her bi van taybetmendiyên xwe ve bibe ruhê berxwedana Cenga Heftanîn. Di nava vê sala Berxwedana Cenga Heftanîn de tenê çalakiyên hêza YJA STAR kirin wisa ne. 66 çalakî hatin lidarxistin û di van çalakiyan de 133 leşkerên dagirker û kontrayên wan hatin kuştin. 19 jî birîndar bûn. 4 kobra hatin derbkirin. Gelek araç û kozikên wan li gel radar û mobasayên wan hatin rûxandin.
Aha dema em dibêjin berxwedana Cenga Şeşdara em behsa kesayet û taybetmandiyên van fermandar û şoreşgerên mezin dikin ku pêşengiya pêvajoyeke dîrokî kirin. Bêgoman hîna gelek sekin û mînakên bi bandor ên di nava vê sala berxwedanê de derketin hene û em ê qismekê ji wan jî di beşa nivîsa xwe ya 3. de bigirin dest.
Êdî ez textîrê ji we şopîner û xwendevanên hêja re bihêlin bê ka li vir kî bi serket û kê windakir. Dijminê dagirker yê tirsonek ên ku nikarin bê bikaranîna teknîkeke hovane gavekê bi pêş de werin, an jî jinên azad ên fedaî ku sînaga xwe dane ber vê teknîka hovane û hefteyeke sax şerê hewayî û bejahî kirin û bi dehan leşkerên dagirker cezakirin, KÎJAN BI SERKET.?!
BERDEWAM DİKE……..
