NAVENDA NÛÇEYAN – 22 sal di ser Komploya Navneteweyî ya li dijî rêber Abdullah Ocalan re derbas bûn ku gelek welat beşdarî wê bûn û di encamê de sala 1998`an rêber Abdullah Ocalan dîl hate girtin û radestî dewleta Tirk hate kirin.
Fermandariya Giştî ya Yekîneyên Parastina Jin (YPJ) di salvegera komployê de daxuyaniyek da. Di daxuyaniya Fermandariya YPJ’ê wiha hate gotin:
“Pêvajoya Komploya Navdewletî ya 9’ê Cotmehê sala xwe ya 22’yemîn temam dike. Ev 22 sal e hemû hewldana hêzên komploger ew e ku têkoşîna bêhempa ya azadiyê ya ku rêber Apo dide, di girtîgeha Îmralî de di hucreyeke yekkesî de û di nava şert û mercên tecrîda girankirî de, asteng bike. Ji zarokên leheng ên Kurdistanê heta tevahî gelê Kurd û hêzên demokratîk û azadîxwaz tu carî ev komplo nepejirandin. Heta mirov bûn wek xelekên ji agir û bi dirûşma “Hûn nikarin Roja me tarî bikin” ji bo rêberê gelan Abdullah Ocalan canê xwe feda kirin. Di heman demê de li hemberî vê pêvajoya komployê rêber Apo bi vîn, têkoşîn û kedeke mezin bi paradîgmaya xwe ya demokratîk, ekolojîk û azadîxwaziya jinan re, ji bo mirovên azadîxwaz bû çavkaniya hêzeke mezin. Rêber Apo ji bo hemû kesên ku ji bo azadiyê dijîn, bû hêza têkoşîn û berxwedanê, ev rastî bi rengekî şênber di şoreşa Rojava de di pêşengiya YPJ’ê de derkete holê.
Di 9’ê Cotmeha 2019’an de wek dewama komployê di çarçoveya êrişên dagirgeriyê de li Serêkaniyê û Til Ebyadê dewleta Tirk a dagirker ji exlaqê şer dûr, bi awayekî hovane di şexsê gelê Kurdistanê de li dijî tevahî gelên bindest û ji bo azadiya xwe têdikoşe, polîtîkayên qirkirin, îmha û înkarê bi aweyekî kirêt nîşan da. Di roja 9’ê Cotmehê de êrişeke bi vî awayî dest pê kirin, qet dîrokeke ne jixweber, di heman demê de li Til Ebyadê û Serêkaniya ku wek mozaîka gelan tê nasîn, gelên ku di çarçoveya pergala neteweya demokratîk de xwe bi rêxistin kirine, di wateya feraseta “yek netewe” de êrişeke dagirkirina dil û mêjî bû.
Artêşa YPJ’ê ya ku pêşengî ji şoreşa Rojava re kir, di heman demê de di kêliya ku jin û gelê herêmê rastî êrişa giran a dagirkeriyê hatin, ji bo ku gelê Serêkaniyê û Girê Spî ji dagirkeriyê biparêzin, destanên efsanewî nivîsandin. Li Til Ebyadê berxwedana ku Delîla, Amara û Dilovanan bi lehengî raber kir, her wiha di Serêkaniyê de hevrêyên wekî Savûşka, Avaşîn, Rûheyv, Nûhal û Dilvînan bi berxwedaneke bêhempa bi dehan êrişên dagirkeriyê şikandin. Ev destanên lehengiyê nîşan dide ku yek kolan jî bi hêsanî nehatiye dagirkirin. Di heman demê de ev berxwedan ji bo me jî di warê parastina şoreşê û sekna li hemberî dagirkeriyê, şêwazê têkoşînkirin û berxwedanê nîşan da.
Ev ruhê berxwedanê di heman demê de bûye bersiva li hemberî hêzên hegemon ên ku komploya 9’ê Cotmehê pêk anîne û da nîşandan ku em ê ji bo azadiyê bê navber têkoşîna xwe bidomînin û tu carî komplo û dagirkeriyê qebûl nekin. Gelê Serêkaniyê û Til Ebyadê jî tu carî dagirkerî li ser xaka xwe nepejirand. Em jî careke din dibêjin, em ê bi şerê gel ê şoreşgerî li dijî dagirkeriyê rawestin, xaka xwe rizgar bikin û şoreşa xwe ji her awayî êrişan biparêzin. Ji bo me wek YPJ di şopa Zîn, Amara, Ronahî, Nûpelda, Nêrgiz û Zîlan Ereb de dem dema xurtkirina têkoşînê ye. Dem dema 10’ê Cotmehê roja azadiya rêber Apo pêkanîn, dawî li qirkirin, tecrîd û dagirkeriyê anîn û dema parastina şoreşê ye.”
