NAVENDA NÛÇEYAN – Li dijî êrişên dagirkerî û qirkeriyê yên dewleta Tirk ên li ser herêmên Zap, Metîna û Avaşînê, Meclîsa Tevgera Ciwanên Şoreşger (TCŞ) daxuyaniyek da û ragihand ku ew tevlî pêngava seferberiyê dibin a ku bi dirûşma ‘Bi ciwanên mîna teyrê baz, li Zagrosan ber bi serketinê ve’ hatiye destpêkirin.
TCŞ’ê diyar kir ku bi beşdariya endamên Meclîsa Rêveber ên ji Fransa, Elmanya û Swîsreyê di demeke dîrokî de wan civîna xwe li dar xistine û destnîşan kir ku civîna wan wê encamên girîng bi xwe re bîne. Di daxuyaniyê de wiha hate gotin:
‘POLÎTÎKAYÊN QIRKIRINÊ DESTPÊKÊ LI DIJÎ RÊBERÊ ME TÊ MEŞANDIN’
“Dewleta Tirk a mêtinger faşîst û hevkarên wê yên herêmî û navneteweyî di şexsê Rêberê me de li dijî tevgera me û gelê me êrişên qirkirinê giran kirine. Hikumeta şerê taybet a AKP-MHP’ê ku hebûna xwe li ser tunebûna gelê me plan dike, derfetên dewletê hemû sefeber kiriye û di serî de li Zap, Avaşîn û Metîna yên Herêmên Parastinê yên Medyayê li çar parçeyên Kurdistanê li her devera ku lêgerîna azadiyê lê heye, êrişan dike. Em baş zanin ku dewleta Tirk a faşîst, polîtîkayên qirkirinê yên li dijî gelê me, destpêkê li Îmraliyê li hemberî Rêberê me dimeşîne. Piştî ku encamek ji vir negirt niha jî li dijî temamiya gelê me xistiye meriyetê. Em bi rengekî eşkere bêjin; Erdogan û çeteyên wî bi bayê bezê ber bi bidawîbûna xwe ve diçin.
‘DI SALVEGERA QIRKIRINA ERMENAN DE XWESTIN QIRKIRINA KURDAN BIBIN SERÎ’
Êrişên ku di 24’ê Nîsanê salvegera qirkirina Ermenan de li ser Metîna, Zap û Avaşînê dan destpêkirin, tesadûfî nînin. Peyama ji vê êrişê eşkere ye; Tê xwestin ku qirkirina Kurdan bibin serî. Berxwedana Gerîlayên Azadiyê yên Kurdistanê ku bi felsefeya Rêber Apo li ber van êrişan radibin, ji niha ve di dîroka azadiyê ya gelê me de bûye xwedî cihekî girîng. Berxwedana gerîla ya ku li dijî bi hezaran leşkerî, bi bi dehan SÎHA, ÎHA, F-16, çekên kîmyewî tê meşandin, mohra xwe li dîroka şoreşê ya cîhanê jî xistiye. Çeteyên dewleta Tirk ku nikarin encamê bi dest bixin ketine sendromê.
‘CIWANÊN APOYÎ, HAYA XWE JI BERPIRSYARIYÊN XWE HEYE’
Em teqez bi berxwedan û serketina gerîla bi bawer in. Lê di heman demê de weke ciwanên Apoyî, haya me ji berpirsyariyên me jî heye. Em ê nebêjin ‘Lêxe gerîla lêxe, Kurdistanê ava bike’, em ê li gel gerîlayên xwe yên leheng ji bo azadiyê têbikoşin, li dijî êrişên qirkirinê em ê li her cihê ku lê ne berxwedanê mezin bikin, azadiya Kurdistanê û azadiya fîzîkî ya Rêber Apo bi hev re misoger bikin. Me got, ‘Ciwan fedayiyên Rêber Apo ne’ û em ê nîşanî dost û dijminan bidin ku ciwanên Rêber Apo çiqasî bi vê soza xwe ve dilsoz in û bi biryar in.
Bi pêngava seferberiyê ya ‘Bi ciwanên mîna teyrê baz, li Zagrosan ber bi serketinê ve’ em ê seferbe bibin, Erdogan û çeteyên wî têk bibin. Em ê êdî gotina xwe bi çalakiyên xwe bêjin; ji niha û pê ve gotina me wê çalakiya me be. Bila kes nebêje ‘kengî, li ku çalakî heye’. Bila bê zanîn ku ‘di her kêliyê de li her cihî’ em ê li çalakiyan bin.
Bi vê baweriyê di serî dew ciwanên Kurdistanê hemû em bang li ciwanên şoreşger, demokrat, antîfaşîst, enternasyonalîst dikin ku cihê xwe di nava vê pêngava me ya seferberiyê de bigirin, beşdarî têkoşîna azadiyê bibin û li dijî êrişên topyekûn ên faşîzmê bi rengekî topyekûn li ber xwe bidin.”