BEHDÎNAN – Di daxuyaniya HPG’ê de hate gotin, “Pêngava 15’ê Tebaxê ya dîrokî ku bi îradeya xurt û biryardariya mezin a fermandarê me yê nemir Egîd hate destpêkirin, hebûna gelê me ji cîhanê re ragihand û têkoşîna çekdarî da destpêkirin. Gelê Kurd ku piştre Têkoşîna Azadiyê ya Kurdistanê bi her awayî parast û di vê oxirê de berdêlên giran da, her tim li gel Gerîlayên Azadiyê yên Kurd cih girt. Gerîlayên ku destketiyên gelê Kurd bi ruhê fedaî diparêzin, berxwedaneke bêhempa nîşan dan. Ev têkoşîna azadî û hebûnê ya pîroz îro jî bi rengekî bênavber dewam dike û ber bi serketinê ve dimeşe.
BERXWEDANA ME YA BI RUHÊ SERKETINÊ YÊ 15’Ê TEBAXÊ DEWAM DIKE
Artêşa Tirk a dagirker dike nake nikare berxwedana hêzên me bişikîne ku di nava şert û mercên zehmet de bi îradeya ji pola, bi wêrekiyeke mezin û bi ruhê fedaî yê Apoyî dimeşîne. Lewma giraniyê dide ser bikaranîna çekên qedexekirî û sûcên şer dike. Hevrêyên me yên li Keleha Berxwedanê ya Werxelê ku di dilê dewleta Tirk de bûye derd, êrîşên dijmin hemû têk birin. Tevî ku bi balafirên şer, helîkopteran, bombeyên taktîk nukleer, çekên kîmyewî, wesayitên zirxî û tankan bi rengekî hovane êrîş kir jî nekarî encamê bi dest bixe. Tunelên şer ên li Qada Berxwedanê ya Werxelê tenê 14’ê Tebaxê 43 caran bi bombeyên taktîk nukleer hatin bombekirin. Hêzên me yên li vê qadê bi ruhê serketinê yê 15’ê Tebaxê berxwedana xwe dewam dikin.
Di çalakiyên pîrozkirina Cejna Vejînê ya 15’ê Tebaxê de ku bi pêşengiya tîmên me yên bi tevger de hatin lidarxistin; 10 dagirker hatin cezakirin û 3 dagirker jî birîndar bûn. Her wiha wesayitek, droneyek û 2 sîstemên kamera yên mobesse hatin îmhakirin. Artêşa Tirk a dagirker Qadên Bexwedanê 61 caran bi bombeyên taktîk nukleer û çekên kîmyewî, 3 caran bi balafirên şer, 12 caran bi helîkopterên êrîşê û bi dehan caran jî bi hawan û çekên giran bombe kir.”
Di daxuyaniya Navenda Ragihandin û Çapemeniyê ya HPG’ê de li ser çalakiyên hatin lidarxistin û êrîşên hatin kirin jî ev agahî hatin dayin:
“Artêşa Tirk a dagirker bi piştgiriya hevkar û kontrayan, li herêma Cûdî ya Botanê qereqolên ji bo dagirkeriyê çêdike û kanên nû yên komirê ji bo talanê dide vekirin. Noker di bin kontrol û ewlehiya dijmin de li qada Bilûrvan a Cûdî li ser vê bingehê talanê dikin.
17’ê Tîrmehê li ser rêya Bilûrvan li hemberî wesayiteke ku kontra tê de bûn û ji Dola Hesena bi rê ketibû, çalakiya sabotajê hate kirin. Di encamê de wesayit hate îmhakirin.
Di çarçoveya Pêngava Şoreşgerî ya Bazên Zagrosê de li herêma Avaşînê;
14’ê Tebaxê saet di 09:20’î de li Qada Berxwedanê ya Werxelê, dagirkeran ji bo keşif û êrîşê kûçik şandin hundirê çeperên şer. Kûçik hatiye bêbandorkirin.
14’ê Tebaxê li Qada Berxwedanê ya Werxelê, 2 sîstemên kamera yên mobesse ku dagirkeran dixwestin li derdora çeperên şer bi cih bikin, ji aliyê hêzên me ve hatin îmhakirin.
Di çarçoveya Pêngava Şoreşgerî ya Bazên Zagrosê de li herêma Zapê;
12’ê Tebaxê droneyek li ser Qada Berxwedanê ya Çemço digeriya, ji aliyê tîmên me yên bi tevger ve hate xistin. Drone û dîmenên wê ketin destê hêzên me.
13’ê Tebaxê saet di 08:20’î de dagirkerên li Qada Berxwedanê ya Çemço bûn hedefa çalakiya koordîneyî ya tîmên me yên bi tevger. Di encama vê çalakiyê de ku bi çekên giran û çekên ferdî hate lidarxistin, 3 dagirker hatin cezakirin, 3 dagirker jî birîndar bûn.
14’ê Tebaxê saet di 16:00 de li Qada Berxwedanê ya Saca, li dijî dagirkerên li derdora çeperên şer, tîmên me yên bi tevger bi sûîqestê çalakî kirin. Di encamê de 2 dagirker hatin cezakirin.
15’ê Tebaxê saet di 03:15’an, tîmên me yên bi tevger ji nêz ve li dagirkeran xistin, ku dixwestin ber bi çeperên şer ên li Qada Berxwedanê ay Çemço ve bi pêş ve biçin. Di encamê de herî kêm 3 dagirker hatin cezakirin.
15’ê Tebaxê saet di 06:45’an tîmên me yên bi tevger ên YJA Starê bi çekên giran li dagirkerên li Qada Berxwedanê ya Çemço xistin.
Di çarçoveya Pêngava Şoreşgerî ya Şehîd Savaş Maraş a Cenga Xabûrê de 14’ê Tebaxê saet di 14:30 û 19:00 de li Qada Berxwedanê ya Girê Cûdî, tîmên me yên bi tevger çalakiyên sûîqestê kirin û 2 dagirker ceza kirin.
Êrîşên artêşa Tirk a dagirker ên bi bombeyên taktîk nukleer û çekên kîmyewî pêk anîn;
14’ê Tebaxê li Qadên Berxwedanê yên Girên FM û Karker 4 caran bi bombeyên taktîk nukleer û çekên kîmyewî bombe li tunelên şer hate barandin.
14’ê Tebaxê li Qada Berxwedanê ya Werxelê, çeperên şer 43 caran bi bombeyên taktîk nukler û çekên kîmyewî hatin bombekirin.
14’ê Tebaxê li Qadên Berxwedanê yên Girê Amediyê û Şikefta Birîndara 14 caran tunelên şer bi droneyan hatin bombekirin.
Êrîşên artêşa Tirk a dagirker ên bi çekên giran, hawan, helîkopter û balafirên şer;
14’ê Tebaxê drone li ser Qadên Berxwedanê yên Girê FM û Girê Amediyê geriyan.
13’ê Tebaxê li herêma Xakurkê qada Goşînê 3 caran bi balafirên şer hate bombekirin.
14’ê Tebaxê Qadên Berxwedanê yên Girê Cûdî û Girê Amediyê 12 caran bi helîkopterên êrîşê hatin bombekirin.
14’ê Tebaxê Şikefta Birîndara û Qada Berxwedanê ya Çemço bi hawan û çekên giran bi dehan caran hatin bombekirin.”
