NAVENDA NÛÇEYAN – Navenda Ragihandinê ya Hêzên Sûriya Demokratîk (QSD) îro daxuyaniyek da. QSD`ê ragihand ku ji bo tolhildana welatiyên di êrişên dewleta Tirk a dagirker de li Kobanê û Amûdê şehîd bûne, hêzên wan li dijî artêşa Tirk a dagirker rêzeçalakiyên bibandor li dar xistine.
Di daxuyaniya QSD`ê de têkildarî çalakiyan ev agahî hatin dayîn;
“Dewleta Tirk a dagirker êrişên xwe yên li dijî axa Bakur û Rojhilatê Sûriyê her roj zêdetir dike. Di van êrişan de bi piranî welatiyên sivîl tên hedefgirtin. Herî dawî di 16`ê Tebaxê de li Kobanê zarokek şehîd ket û 4 welatî jî birîndar bûn. Dîsa di heman rojê de, balafireke bêmirov a biçek a artêşa Tirk a dagirker li gundewarên Amûdê êrişek li dijî nuqteyeke Hêzên Erka Xweparastinê pêk anî û di encamê de 5 şervan şehîd bûn û gelek welatiyên ku hewl didan birîndaran rakin nexweşxaneyê jî birîndar bûn.
Ji bo bersivdayîna van êrişan, ji aliyên hêzên me ve li hember artêşa Tirk a dagirker rêzeçalakiyên bibandor hatin lidarxistin. Di vê çarçoveyê de;
Li sînorên bajarên Riha, Dîlok û Mêrdînê, li hember artêşa Tirk a dagirker 3 çalakiyên bibandor hatin lidarxistin.
DI NAV DE EFSEREK, GELEK LEŞKERÊN DAGIRKER HATIN KUŞTIN
Di çalakiya yekemîn de, li nêzî qereqola Çiçekalan a li navçeya Bêrecûk a bajarê Rihayê, dema ku 6 leşkerên artêşa Tirk a dagirker li derdora obîseke bi cureya T-155 kom bûbûn, hatin hedefgirtin. Di encama wê çalakiyê de li gorî agahiyên ku hatin girtin, efserek û endamekî îstixbaratê jî di nav de bi giştî 6 leşkerên artêşa Tirk a dagirker hatin kuştin. Gelek birîndarên dijmin jî hene lê der barê hejmara birîndaran de agahiyên zelal nehatin bidestxistin. Di encama wê çalakiyê de di cebilxaneya baregehê de jî teqîn çêbû.
Di çalakiya duyemîn de, qereqola Koprubati ya girêdayî navçeya Karkamiş ya bajarê Dîlokê hat hedefgirtin. Di vê çalakiyê de hejmara kuştî û birîndarên artêşa Tirk a dagirker nehatin zelalkirin.
Çalakiya sêyemîn li sînorê bajarê Mêrdînê hat lidarxistin. Di çalakiyê de seyareyeke bi cureya Kîrpi hat hedefgirtin. Di encama wê çalakiyê de leşkerek hat kuştin, 3 leşker jî birîndar bûn.
‘ÇALAKIYÊN BERSIVDAYÎNÊ DÊ DEWAM BIKIN’
Di wan çalakiyan de bi giştî 7 endamên artêşa Tirk a dagirker hatin kuştin, herî kêm 3 leşker jî birîndar bûn. Li dijî her cure êrişên dewleta Tirk a dagirker, çalakiyên me yên bersivdayînê dê berdewam bikin.”
