NAVENDA NÛÇEYAN – Pêngava Mirovî û Ewlehiyê ku bi pêşengtiya Hêzên Ewlekariya Hundirîn û bi piştgiriya QSD, YPG/YPJ`ê di 25`ê Tebaxê de li Kampa Holê hate destpêkirin heya niha berdewam dike.
Ev pêngav piştî kiryarên tundiyê li kampa Holê zêde bûn, her wiha hemwextî êrişên dewleta Tirk a dagirker û gefên wî yên dagirkirina herêmên Bakur-Rojhilatê Sûriyê pêk hat. Şane û malbatên çeteyên DAIŞ´ê 43 êrîş pêk anîbûn, di encamê de 44 niştecihên kampê hatin kuştin, ji wan 14 jin û 2 zarok bûn. Ew kiryar bi debanceyên bê deng û alavên tûj pêk hatin e.
Têkildarî mijarê şervanên YPJ’ê ku ew jî cihê xwe di nava oprasyonê de digirin, ji ajansa me re axivîn û diyar kirin ku armanca wan ji vê oprasyonê ewe ku tevahî mirovahiyê ji hovîtiya DAIŞ’ê xilas bikin.
Destpêkê şervana YPJ’ê ya bi navê Dilar Serhed diyar kir ku pêngava Mirovî û Ewlehiyê ji bo rizgarkirina tevahî mirovahiyê hatiye destpêkirin û got; “Me di Kampa Holê de, dest bi oprasyoneke bi navê Ewlekarî û Mirovî kiriye. Di nava vê operasyonê de, me jî weke şervanên YPJ’ê cihê xwe giritiye. Di nava vê oprasyonê de, em bi xwe bûn şahidê hinek xeteriyan. Gelek jinên ku hatibûn dîl girtin, ew hatin rizgar kirin. Gelek cebilxaneyên wan hatin desteser kirin. Di nava jinên ku me rizgar kirî de jineke Êzîdî hebû, ew jî hate rizgar kirin. Ev oprasyon ne tenê ji bo gelên Bakur-Rojhilatê Sûriyê ye, ji bo tevahî gelên cîhanê hatiye destpêkirin.”
Her wiha Dilar axaftina xwe wiha domand; “Ev xetetiyên ku DAIŞ li her derê bi pêşxistî, em weke şervanên YPJ û YPG’ê pêşî li van xeteriyan digirin. Bi taybet em weke şervanên YPJ’ê cihê xwe di vê oprasyonê de digrin, û em dixwazin bi encama ku em derbixînin re li tevahî herêmên Bakur-Rojhilatê Sûriye yê, û li giştî cîhanê ewlehiyê zêde bikin û gelê xwe ji van xeteriyan rizgar bikin. Em dîsa dibêjin heya dawiyê erka ku dikeve ser milê me, emê pêk bînin.”
Di Pêngava Mirovî û Ewlehiyê ya li kampa Holê de, Hêzên Ewlekariya Hundirîn û YPJ’ê 3 jinên kelemçekirî peyda kirin ku li ser wan şopên îşkenceyê hene. Ev jin li beşa 7’an a kampê di cihekî taybet ê ji bo îşkencekirinê de hatin dîtin. Nasnameyên jinan nehatin zanîn. Di roja 9’an a qonaxa duyemîn a Pêngava Mirovî û Ewlehiyê de zarokeke êzidî bi navê Wefa Elî Ebas jî hat rizgar kirin.
Di vê çarçoveyê de jî şervana YPJ’ê Rozerîn Amanos jî got; “Navê min Rozerîn Amanos, em weke Yekîneyên Parastina Jin tevlî oprasyona “Ewlehî û Mirovî” bûne. Me ev oprasyon da destpêkirin, da ku em gelê vê derê jiyan dikin rizgar bikin û çeteyên DAIŞ’ê jî bigirin. Me li vê derê gelek çete girtin, me gelek kes jî rizgar kir, ji kesên ku me rizgar kiriye jineke Êzîdî hebû. Piştî ku me ew jina Êzîdî rizgar kir, çar jinên dîtir jî hebûn ku ew bi zincîran hatibûn kelemçe kirin me ew ji nava destê DAIŞ’ê xilas kirin.”
Heman demê de Rozerîn ji gelê xwe re diyar kir ku ewê heya dawiyê li kêleka wan bin û wan biparêzin; “Di çarçoveya vê oprasyonê de me gelek amûrên wan yên leşkerî dîtin. Gelek tunelên ku wan kola bûn me dîtin, di van tunelan de gelek çek, bombe û mermiyên wan hebûn. Di nava tunelan de lojîstîka xwe çêkirine, ji bo ku karbin tê de jiyan bikin. Ev oprasyon ne tenê ji bo herêmên Bakur-Rojhilatê Sûriyeyê ye, ji bo tevahî gelan bû. Me ev oprasyon destpêkir ji bo DAIŞ xwe careke din belav neke. Em jî weke YPJ’ê tevlî vê oprasyonê bûne, da ku em ji tevahî gelan re aşîtî û azadiyê bînin. Emê heya dawiyê li kêleka gelê xwe bin û emê wan di ewlehiyekê de bihêlin.”
