NAVENDA NÛÇEYAN – Dosyaya me taybet di beşa xwe ya pêncemîn de derbarê têkoşîna şehîd Delal Şoreş de ye.
Fermandariya Biryargeha Navenda Parastina Gel kesayeta Şehîd Delal Şoreş bi vê awayî pênase kir;
Hevrêya me Delal li bajarê ronahiyê û serhildanê Silêmanî di malbateke welatparêz de ji dayik bû. Şerê ku Tevgera me ya Azadiyê li dijî dagirkeriyê daye meşandin û têkoşîna ku bi tevahî li ser derfetên gelê me pêş ketiye, hem li Başûrê Kurdistanê hem jî li herêmên din ên Kurdistanê bandor li gelê me kiriye. Gelek hevrêyên me bi taybet ji Silêmanî û ji her bajarê Başûrê Kurdistanê tevlî refên PKK’ê bû û bi dehan hevrêyên me yên qehreman wek Doktor Sîrwan, Viyan Soran, Helmet (Diyar Xerîb) û Berfîn Rêbaz ji bo têkoşîna azadiya gelê me, bi awayek fedaî şer kirin û gihiştin şehadetê. Hevrêya me Delal ku birayê wê jî di nava refên azadiyê de ye hem bi tevlîbûna birayê xwe hem jî bi van şehîdên leheng ên mezin bandor bû. Bi vê bandora xwe re Rêbertiya me û Partiya me ji nêz ve nas kir û bawer kir ku têkoşîna me ya azadiyê ya bi pêşengiya Rêbertiya me û şehîdên me yên leheng wê hem jin hem jî gelê me azad bibe.
Li ser vê bingehê hevrêya me Delal ku di sala 2017’an de biryara tevlîbûna nava refên gerîla girt, piştî perwerdeya xwe ya yekemîn tevlî çalakiyên Komalên Ciwan bû. Di dema xebatên xwe yên ciwantiyê de hewl da gelê me û ciwanên Kurd germahiya şerê li Kurdistanê û berdêla ku hatiye dayîn têbigihê; Bang li gelê me kir ku tevlî nava refên têkoşînê bibin û ciwan jî tevlî nava refên gerîla bibin. Di vê wateyê de di nava civakê de hişyariyek çêkir û bi dehan ciwan li dijî dagirkeriyê di refên azadiyê de têdikoşin. Hevrêya me Delal ku di xebatên ku di nav de cih girtiye jî xwe perwerde kiriye, hestên xwe yên şoreşgerî hîn zêdetir mezin kiriye û biryardarî û îradeya xwe ya têkoşînê mezin kiriye. Di şerê dijwar de şehadeta hevrêyên wê gelek bandor li têkoşîna wê kiriye û her wiha xwesteka wê ya gihandina çiyayên azadiyê roj bi roj zêdetir dike.
Di pêvajoyeke ku gelê me bi xetereya qirkirinê re rû bi rû ye û êrîşên dijmin roj bi roj zêde dibin de hevrêya me Delal dîsa berê xwe daye çiyayên azad û cihê xwe di çeperên berxwedanê de girtiye. Hevrêya me Delal ku li Zapê di nava pêvajoya şer de cih girt, di qada leşkerî de bi lez xwe perwerde kir û rêgezên bingehîn ên gerîlatiya serdema nû hîn bû û jiyan kir. Hevrêya me Delal ku xwedî vîneke mezin a têkoşînê ye, ji bo tevlî çalakiyên li dijî dijmin bibe kedeke mezin da û encamên van hewldanan jî girt. Bi tevlîbûna li gelek çalakiyên li dijî dijmin ên li Zapê, hêrsa bi salan ji dijmin derxist û weke gerîlayeke pêşeng a YJA Starê tola hevrêyên xwe yên şehîd hilanî. Hevrêya me Delal ku di her pêngava êrîşên dagirkeriyê yên dijmin ên li dijî herêmên Zap, Avaşîn û Metîna de cih girt, ji çêkirina tunelên şer heta amadekirina tîmên bi tevger, beşdarî gelek xebatan bû û bi hevrêyên xwe re li dijî operasyonên dijmin xwe amade kir. Hevrê Delal ku di nava komên ku derbeya yekemîn li hember êrîşên dijmin dan, ji destpêkê ve rengê berxwedana xwe diyar kir. Dewleta Tirk a qirker ku li dijî îradeya Apoyî ya hevrêyên me encam negirt, dîsa çekên kîmyewî û bombeyên qedexe bikar anî. Di van êrîşên hovane yên dijmin de hevrêya me Delal heta nefesa xwe ya dawî bi vîn, bawerî, cesaret û îradeyeke bêhempa ya Apoyî şer kir û gihişt şehadetê.
