NAVENDA NUÇEYAN – Komîteya Rêveber a Tevgera Şoreşê ya Yekbûyî ya Gelan (HBDH) daxuyaniyek weşand û got, “Biryardariya meha Gulanê li ser serketinê û israra wê ya şoreşgerî ji ber sekna bi rûmet a pêşengên me yên şoreşger e ku li dijî êşkence, teslîmiyet û xiyanetê nîşan dan. Kevneşopiya bilindkirina ala berxwedanê di meha Gulanê de şîn bû. Rojên herî bi biryar ên şerê me yê sosyalîzm û şoreşê ji aliyê hevrê Îbrahîm Kaypakkaya, Hakî Karer, Ferhat Kûrtay, Eşref Anyik, Mahmût Zengîn û Necmî Oner ve hatine afirandin. Ew rûmet û hêvî ne.”
Di daxuyaniyê de hate ragihandin ku di 18’ê Gulana 1973’an de zindana Amedê berxwedana bêhempa ya Îbrahîm Kaypakkaya dît û hate gotin, “Wê rojê hevrê Îbrahîm Kaypakkaya ispat kir ku îrade teslîm nayê girtin, di heman demê de hêzên dijmin têk bir. Dijmin çi êşkence kiribe jî nekarî ya dixwaze bi dest bixe. Dîrok Îbrahîm Kaypakkaya bi berxwedana li dijî mêtingerî, zilm û êşkenceyê bi bîr tîne, lê kujer û celat, navê wan, cismê wan jî nayên bîranîn, tenê bi çalakiya cezakirinê têne bîranîn.”
Di dewama daxuyaniyê de hate ragihandin ku Îbrahîm Kaypakkaya di mijara Kemalîzm û pirsgirêka Kurd de sekneke girîng nîşan da û hate gotin, “Felsefeya wî ya pêşengiyê û sekna wî ya dilnizm a şoreşgerî îro li xaka Kurdistan û Tirkiyeyê, bûye mînakek li nava gelê me.”
‘HAKÎ KARER ENTERNASYONALÎZM DI KESAYETIYA XWE DE AFIRAND’
Têkildarî şehadeta Hakî Karer di daxuyaniyê de hate gotin, “Di 18’ê Gulana 1977’an de hevrê Hakî Karer tevlî karwanê nemiran bû. Ya ku hevrê Hakî Karer bêhempa kir ew taybetmendî bû ku enternasyonalîzm di kesayetiya xwe de afirand, bi vê sekna xwe bû yek ji pêşengên destpêkê yên Tevgera Azadiyê ya Kurd. Bi nasnameya xwe ya Tirkekî ji Derya Reş di bingeha têkoşîna azadiyê ya gelê Kurd de ew jî hebû. Dema ku li Dîlokê hate qetilkirin û bedena wî ji xaka Kurdistanê heta bi Ordûyê hate birin, hingî hîmên têkoşîna yekbûyî ya gelan hate danîn.”
‘ÇARAN BI BERXWEDANÊ RABÛN, DERB LI DIJMIN XISTIN’
Di daxuyaniya HBDH’ê de hate gotin, “Hverê Ferhat Kûrtay, Eşref Anyik, Necmî Oner û Mahmût Zengîn jî li zindana Amedê di 18’ê Gulana 1982’an de dema ku bedena xwe dan ber agir navên wan êdî bû ‘Çaran’. Çar hevrê, çar hevalan li dijî teslîmiyetê, li dijî xiyanetê bi îrade û berxwedanê rabûn. Li dijî hemû êrîşên li ser gelê Kurd, çalakiya fedaî ya li nava dîwarên girtîgehê veguherandin kêliya serketinê.”
HBDH’ê destnîşan kir ku berxwedana zindanan a li dijî êrîş û êşkenceyê, bi hêrsa gel re bû yek û derbeke giran li darbekaran û serwerên Tirkiyeyê xistin.
‘DI HER PRATÎKÊ DE HÊZA ŞOREŞA YEKBÛYÎ HEYE’
Di dawiya daxuyaniyê de hate gotin, “Di her pratîka hevrê Îbrahîm, Hakî Karer û Çaran de, hêza şoreşê ya yekbûyî heye. Hevrê Îbrahîm hesabê Sînanan pirsî, Hakî Karer ji Derya Reş heta bi Kurdistanê bû pêşengê yekbûyînê, Çaran li zindanan moral dan şoreşgeran hebûyan, bi vî rengî nîşan dan ku bingeha şoreşa Tirkiye û Kurdistanê çawa ava bûye. Bûyîna mîna wan, şerkirina mîna wan pîvana vê demê ye ku divê mirov xwe bigihîne wê astê. Hevrê Kaypakkaya, Hakî Karer û Çaran sonda me ya şer a têkoşînê ye. Îbrahîm Kaypakkaya, Hakî Karer û Çaran bûn pêşengên şoreşa yekbûyî. Em ê hesabê êşkenceya li wan hatiye kirin her kêliyê, di her şert û mercî de bipirsin. Ala ku me ji wan wergirtî bi dîroka têkoşînê li ba ye. Alaa şoreşa yekbûyî, em ê li bircên faşîzmê biçikînin. Em ê faşîzmê hilweşînin, azadiya xwe misoger bikin.”
