BEHDÎNAN – Gerîlayên Azadiyê yên Kurdistanê di bin ala PKK’ê de bi lehengiyeke mezin bêteredût li ber xwe didin.
Li Kurdistanê êdî artêşeke gel heye ku li dijî her cûre êrîşan dikare xwe biparêze. Ev artêşa ku ji aliyê Rêber Apo û milîtanên wî ve hate avakirin, ji aliyê taktîk, rêbaz û profesyoneliyê ve di nava demeke nû de ye. Bi çalakiyên destanî dike ku dewlet û artêşa Tirk windahiyên giran bide. Artêşa Tirk ku weke yek ji artêşên herî xurt ên cîhanê tê pênasekirin; ji pêkanîna komkujiyên sivîl, bikaranîna çekên qedexekirî û talanê nade alî, li hemberî gerîla bêçare maye. Artêşa Tirk û wezareta şer, bi şoqa windahiyên giran nizane bê çawa binixumîne. Bi veşartina hejmara miriyan ji medyayê cenazeyên wan leşkeran ji holê tune nabin.
SOZ DANE KU SIYA DIJMIN JÎ NEHÊLIN
Ji Rojavayê Zapê heta bi Metînayê, ji wir jî heta Xakurkê gerîla di nava berf û baranê, serma û seqemê de li çeperên dijmin dixin, îradeya xwe, biryardariya xwe ya ji bo serketinê careke din nîşan dide. Dost û dijmin her kes dibîne ku gerîla bi rengekî fedaî çawa bi ser çeper û bi hezaran leşkerên dijmin ve dimeşin. Li hemberî hêza potansiyel a gerîla ti teknîk û hêz nikare bisekine. Gerîla ku bi dilsoziya bi azadiya gel û perspektîfên Rêbertî her roj xwe perwerde dike û di taktîkê de xwe nû dike, soz daye ku li çiyayên Kurdistanê siya dijmin jî nehêle.
DIBE DERMAN JI DILÊ GELÊ KURD RE
Weke ku tê zanîn li Herêma Rojavayê Zapê hêzên gerîla di çarçoveya Pêngava Şehîd Savaş Maraş, Cenga Xabûrê û Operasyona Şoreşgerî ya Şehîd Helmet Dêralûk de li Qada Berxwedanê ya Girê Amediyê li dijî çeperên leşkerên dewleta Tirk çalakî lidar xistin. Di vê çalakiyê de herî kêm 61 leşker hatin kuştin. Qîrîna leşkeran û cenazeyên leşkeran ên li ser berfê, her wiha çeperên leşkeran ên hatin şewitandin ji aliyê kamerayên gerîla ve hatin kişandin. Hêrsa tolhildanê û kelecana serketinê ya gerîla li gel berfê û sermayê jî diyar bû. Ev pêngavên gerîla ku gelek çalakiyên bi heman rengî lidar xistin dibe derman ji dilê gelê Kurd re.
Dewleta Tirk sê sal in timî îdîa dike ku tenê sê meh mane, wê gerîla biqede û bi vî rengî gelê Tirkiyeyê dixapîne. Halbûkî gerîla tevî derfetên kêm jî bi îradeyeke ji pola, bi ruhê Apoyî xwe dispêre mîrateya berxwedanê ya PKK’ê û berê xwe dide vîzyona Kurdistana azad û Rêberê azad, bi vî rengî li dijî artêşeke welê şer dike ku ev artêş xwe ji ti sûcî nade alî. Gerîla her carê li rûyê dijmin dixe ku kes nikare temenekî ji Tevgera Azadiyê ya Kurd re diyar bike. Gerîla ji Metîna heta bi Avaşînê, ji Zapê heta bi Xakurkê û ji wê derê jî heta çar parçeyên Kurdistanê bendên parastinê ava dike.
