NAVENDA NÛÇEYAN – Komîseriya Bilind a Hilbijartinan a Herêma Bakur û Rojhilatê Sûriyeyê ragihand ku propagandaya hilbijartinê ya hilbijartinên şaredariyan ji 26ˊê Gulanê heta 10ˊê Hezîranê dest pê dike.
ˊTifaqa Gelan û Jinan a ji bo azadiyêˊ ku beşdarî hilibijartinan dibe, li Hesekê û Qamişlo yên kantona Cizîrê, kantona Minbicê, kantona Reqa û bajarê Kobanê yê kantona Firatê mîhrîcanên propagandaya hilbijartinê li dar xistin da ku namzetên bide nasîn û bernameya hilbijartinê aşkera bike.
QAMIŞLO
Di propagandaya hilbijartinê a Tifaqê ya li Parka Azadî ya bajarê Qamişlo de xelkê ji Amûdê, Qamişlo, Tirbespiyê, Çilaxa, Girkê Legê, Dêrik, Til Koçer û Til Hemîsê beşdar bûn.
Hevseroka Partiya Yekitiya Demokratîk (PYD) Asya Ebdullah got: “Ev hilbijartin destkeftiyeke dîrokî ya gelên Herêma Bakur û Rojhilatê Sûriyeyê, berdewama têkoşîna dîrokî ya pêkhateyên herêmê û fedakariya bi hezaran keç û xortên wê ne.”
Endamê Sekreteriya Giştî ya Desteya Niştîmanî ya Erebî Hikmet Hebîb got: “Tifaqa Kurd, Ereb, Suryan û jin di lîsteya me de peyamek e ji bo gelê Sûriyê ku em xwedî projeyeke demokratîk in û em ê di vê projeyê de ku ew wek çareseriya krîza Sûriyê ye, berdewam bin. Beşdariya di vê projeyê de jî erkekî niştîmanî û neteweyî ye. Namzetên lîsteya me jî dê xizmeta pêkhateyên herêmê bikin.”
Her wiha, hevserokê Partiya Yekitiya Suryanî Senherîb Bersûm li ser girîngiya stratejîk a vê destkeftiyê ji bo hemû pêkhateyên herêmê yên ku bi salan bindest bûn, axivî û bang li hemûyan kir ku dengê xwe bidin.
Piştre namzetên Tifaqê yên şaredariyên Qamişlo, Amûdê, Tirbespiyê, Çilaxa, Girkê Legê, Til Koçer, Til Hemîs û şaredariyên herêmê ku bi giştî 66 namzetên 33 şaredariyan in, hatin diyarkirin.
REQA
Li Reqayê mîhrîcan li yarîgeha beledî hat lidarxistin. Di mîhrîcanê de berdevka Kombûna Jinan a Zenûbiya ya beşdarî Tifaqê bûye Xod El Îsa axivî û got: “Tifaqa me xizmetî armancên gelê Bakur û Rojhilatê Sûriyeyê yê di oxira azadiyê de şehîd daye dike.”
Xod wiha domand: “Jin bi nasnameya xwe beşdar dibe û dengê xwe dide. Li pêşberî van fedakariyên şehîdan em ê jineke xurt bigihînin ku civakeke demokratîk bi vîna gel ava bike. Ji lew re em bang li gelê xwe dikin berê xwe bidin sendoqan.”
Hevseroka Partiya Sûriya Pêşerojê Kewser Doko jî got: “Gelê yê Reqayê em jidayikbûneke nû ya dîrok jidayikbûna avakirin û şaristaniyê, avakirina şaredariyên demokratîk radigihînin. Em dizanin ji 60 salî ve Sûriye di vê qonaxê re derbas nebûye. Em hilbijartinên demokratîk li Bakur û Rojhilatê Sûriyeyê radigihînin.”
Li ser navê ˊTifaqa Gelan ji bo Avakirin û Pêşketinêˊ bang li gelê xwe dikin ku di 11ˊê Hezîranê de berê xwe bidin sendogên dengdanê.
Dûre beşdarên Tifaqê li ser dikê sekinîn û xwe dan nasîn. Piştre stranên Erebî û Kurdî ji hêla koma Navenda Çandê ya Reqayê ve hatin pêşkêşkirin.
MINBIC
Bi sedan xelkê Minbic li yarîgeha beledî kom bûn û beşdarî mîhrîcana propagandaya hilbijartinê ya ˊTifaqa Gelan û Jinan ji bo azadiyêˊ bûn. Di mîhrîcanê de hevserokê Partiya Sûriya Pêşerojê Ebid El Hamid El Mihbaş axivî û got: “Ev qonaxa hilbijartinan girîng e. Pêdivî bi hewldan û kedên zêde heye ku pêşketin misoger be û mafên tevahî pêkhateyan pêk bê.”
Berdevka Kombûna Jinan a Zenûbiya ya kantona Minbicê Ruweyda Hinêzil axivî û got: “Ji ber bawerî û vîna me ku civakeke demokratîk li ser bingeha îdeolojî û azadiya jina demokratîk pêk bînin me ev qonaxa ber bi azadiyê ve avêt.”
Dûre namzetên Tifaqê li ser dikê xwe dan nasîn.
