NAVENDA NÛÇEYAN- Hêzên Rizgariya Efrînê şehadete hevreyê xwe Dîyar Xerîb ragihand. Daxuyaniya HRE bi vî rengî ye:
“Ji Çapemenî û Rayagiştî re!
Rêhevalê me Diyar Xerîb ku ewladekî hêja ê ji Başûrê Kurdistanê bû, di gelek qadên şer ên li Kurdistanê de têkoşîn kir, herî dawî berê xwe da Rojava û li hember dijminê gel û şoreşa me sekna şoreşgerî raber kir û heta nefesa xwe ya dawî bi têkoşîna xwe ispat kir. Di dîroka 22’yê Îlona 2024’an de li herêma Efrînê dema li ser erka xwe bû gihişt asta şehadetê.
Hevrêyê me Diyar Xerîb ku bi navê xwe yê din Karwan Hecî ve tê naskirin, li bajarê Zaxo ê Başûrê Kurdistanê di nava malbateke welatparêz û girêdayî nirxên Kurdayetiyê de ji dayîk dibe. Ji ber van taybetmendiyên malbata xwe û di heman demê de dema komên çeteyên cîhadîst di destpêka alozî û qeyrana Rojhilata Navîn de êrîşên xwe anîn ser gelê me yê Rojavayê Kurdistanê û Başûrê Kurdistanê li dijî gel komkujî pêk anîn. Li hemberê van êrîşên hovane ê çeteyên cîhadîst jî çawa bi rihê netewî gel herikîn qadan û bi zarokên xwe ve mil bi mil parastinê xurt kirin. Hevrê Diyar Xerîb jî yek ji wan ciwanan bû ku sekin û temaşekirin di dil û mejiyê xwe de ji xwe re hezm nekir, di milekî de kîn û hêrsa wê li hemberî dijminê xedar zêde bû li milekî din jî bi çîrokên lehengî û qehremaniyên keç û xortên welatê me bandor bû. Li ser van hestan soz da ku ew jî berê xwe bide nava refên şoreşê. Di kêliyên herî zor û zehmet de li Başûrê Kurdistanê bi erk û wezîfeya xwe ya demê rabû, piştî demekî şûnda vê carê jî berê xwe da qadên Rojavayê Kurdistanê.
Rêheval Diyar dizanibû ku ancax bi têkoşînekî xurt û bi îradeyekî ji pola bikaribe li hemberî dagirkerên demê şerekî bê eman bide meşandin. Ji bo vê yekê jî xwe perwerde kir, her ku xwe nas kir û wisa jî hîn bêhtir rastî û heqîqeta dijmin û pê ve jî girêdayî hişmendî, siyaset û polîtîkayên qirêj ên li ser gelê me tê kirin kete ferq û zanebûna wê yekê. Di warê birdozî û bi taybetî jî di warê biranşa leşkerî de xwe jîr û zana kir, bû hevalekî ciwan ê xwedî şareza. Bi van ezmûn û danehevên xwe yê şer di sala 2019’an de hem cihê xwe di pêngava rizgarkirina Bahozê û her wiha dîsa di şerê Berxwedana Rûmetê ê Serêkaniyê de bi awayekî fedaî li refên herî pêş da girt.
Rêheval Diyar bi hişmendî û zanebûna li ku derê pêwîstiyên şoreşê hebe berê xwe da wê derê û bi têkoşîna xwe ya li hember komên çeteyên cîhadîst ên mîna El Nusra, DAIŞ û her wiha komên cûda ên xwînmij ku dewleta Tirk a dagirker wan xwedî dike bû xwedî seknekî mînak. Herî dawî jî li ser van esasan berê xwe da herêma Efrînê di nava Hêzên Rizgariya Efrînê de dest bi şerê rizgariyê kir. Rêheval Diyar xwe ti carî neda aliyekî, ji roja ku tevlî bû heya kêliya xwe ya dawî jî her li refên herî pêş bû. Bi awayekî fedaî tevlî pêngavên rizgarî û çalakiyên ku tê kirin bû, cih hat bû şervan û cih jî hat bû fermandar û pêşengtî ji şer û jiyanê ra kir.
Em weke Hêzên Rizgariya Efrînê soza xwe nû dikin ku em ê xeyal û armancê hevalên xwe yê şehîd pêk bînîn. Ala ku hevrê Diyar Xerîb dewrî me kir, em ê bihêlin ku her li ba be. Li ser van esasan di serî da em sersaxiyê ji malbata hevrêyê xwe Diyar Xerîb û tevahî gelê xwe yê welatparêz ê Kurdistanê ra dixwazin.
Nasnav: Diyar Xerîb
Nav û Paşnav: Karwan Hacî
Navê Dayikê: Buhar
Navê Bav: Mihemed
Cih û Dîroka Şehadetê: Herêma Efrînê / 22’yê Îlona 2024
Hêzên Rizgariya Efrînê
29’ê Îlona 2024
