ŞEHBA- Koçberên Efrîn û xelkê Şehba li kampa Berxwedan a bajarokê Fafînê ya kantona Efrîn û Şehbayê sersaxî da malbatên endamên Tevgera Civaka Demokratîk (TEV-DEM) şehîd Mazlum Antep, Zelal Efrîn, Alaf Murad û şervanê HREʹyê şehîd Zindan Efrîn.
Di merasîmê de rêveberê Hêzên Ewlekariya Hundirîn a Kantona Efrîn û Şehba Hikmet Reşîd axivî û sersaxî da malbatên şehîdan û got: “Ew ê li ser şopa şehîdên azadiyê têkoşîn û berxwedanê dewam bikin.”
Li aliyekî din jî endama Meclisa Edaleta Civakî ya kantonê Şaziya Îbrahîm axivî û got: “Ji ber ku di tevahî aliyên siyasî û leşkerî de jina Kurd xwe îsbat kiriye, dijmin wê hedef digire.”
Endama Meclisa Malbatên Şehîdan a Helebê Remziye Salih jî axivî û soz da ku ew ê berxwedanê bidomînin û her tim li qadan bin û got: “Dewleta Tirk a dagirker nikara vîna gelê berxwedêr têk bibe.”
Di merasîmê de sînevîzyonek li ser jiyan û têkoşîna şehîd Zelal Efrîn û şehîd Mazlum Antep hat pêşandan.
Merasîm bi diruşmên ʹşehîd namirinʹ bi dawî bû.
