ŞEHBA- Êrîşên Heyet Tehrîr El-Şam (HTŞ) ên li dijî Helebê didomin. Ji ber ku hêzên girêdayî hikûmeta Şamê li hember êrîşan li ber xwe nedan, pêşveçûna HTŞ’ê hêsan kir. Îro jî leşkerên rejîma Sûriyê li Şehbayê jî kiryarên xwe yên mîna yên Helebê dubare kirin. Leşkerên girêdayî Hikûmeta Şamê Şehba terikandin û reviyan.
Li bajar bi taybet bi girtina nuqteyên stratejîk re rageşî zêde dibe, gelê li taxên Şêxmeqsûd û Eşrefiyê û Şehbayê li ser esasê Şerê Gel ê Şoreşgerî li dijî êrîşên muhtemel amadekariyên xwe didomînin.
Di heman demê de bertekên ciwanan ên li dijî êrîşên dagirkeriyê dewam dikin. Ciwan li dijî êrîşan îro jî mîna duh û roja berê li qadan meşiyan.
Li ser navê Tevgera Ciwanên Şoreşger beriya meşê Dogan Efrîn axivî û got, “Dijmin wê ti carî nikare moralê vî gelî kêm bike. Ger em weke gel bibin yek, dijmin ti carî nikaribe li hemberî me bisekine û bi ser bikeve.”
Ciwanan bi pankarta “Bijî Şerê Gel ê Şoreşgerî” û doviza “Bijî Berxwedana Gelê Helebê” bertekên xwe yên li dijî dagirkeriyê nîşan dan û di heman demê de bang li gel û bi taybet ciwanan kirin ku têkoşîna Şerê Gel ê Şoreşgerî de cîh bigrin.”
Çalakî bi dirûşmeyên “Bijî Serok APO” û “Bijî Berxwedana Efrînê” bi dawî bû.
