KOBANÊ- Gel û ciwan li ser bingeha Stratejiya Şerê Gel ê Şoreşgerî li dijî êrîşên dewleta Tirk a dagirker û çeteyên SNA yên li ser xaka Bakur û Rojhilatê Sûriyê li ber xwe didin. Bi sedan ciwan li eniyên pêş ên eniyê ne, bersivê didin banga seferberiyê.
Li Kobanê endamên Tevgera Ciwanên Şoreşger li gel şervanên QSD’ê cih digirin û li eniyên şer li dijî êrîşên muhtemel ên li ser gel û axa wan li dijî çeteyan şer dikin.
Ciwanên ku ji ajansa me re axivîn diyar kirin ku ew bi hêz û vîna xwe bawer in û ji bilî serketinê tiştekî din qebûl nakin û ew ê di vî şerî de bi ser bikevin.
Hevberdevkê Tevgera Ciwanên Şoreşger ên Kobanê Şervan Kobanê diyar kir ku ew weke ciwan gel û welatê xwe diparêzin û got, “Dijmin di her warî de dixwaze êrîşî me bike, bi polîtîkayên şerê taybet gelê me bitirsîne û koçber bike. Weke ciwanên Kobanê erka me ew e ku em di nava gel de bin û gel û ciwanan li ser esasê fikir û felsefeya Rêber APO bi rêxistin bikin. ”
Şervan anî ziman ku ciwan li her tax û kolanên Kobanê nobetê digirin û got, “Em jî cihê xwe li eniyên şer digirin. Weke ciwan heta em sax bin em ê nehêlin Kobanê mîna salên 2014-2015’an were talankirin. Heta dilopek xwîna me bimîne em ê nehêlin Kobanê bê girtin.”
Di dawiyê de endamê Tevgera Ciwanên Şoreşger Şervan Kobanê, bang ji ciwanên Kurdistanî û Ewrupa re kir ku tevlî Berxwedana Kobanê bibin.
Dijwar anî ziman ku weke endamên Tevgera Ciwanên Şoreşger li qeraxên Çemê Firatê li dijî êrîşên dagirkeriyê tedbîrên ewlehiyê girtin û got, “Dijmin di sala 2014’an de ket Kobanê û di encama têkoşîna xwe de me dijmin ji nava Kobanê derxist. Îro em ê dîsa bi têkoşîneke mezin dijmin têk bibin.”
Dijwar diyar kir ku baweriya wan bi gelên Bakur û Rojhilatê Sûriyê heye û got, “Em ê bi têkoşîna gelê Şoreşgerî re bibin yek û welatê xwe azad bikin. Ger hemû ciwanên Bakur û Rojhilatê Sûriyê bên gel hev em ê dijmin têk bibin. Em ji bilî serkeftinê tiştekî din qebûl nakin. Heta dilopek xwîna me bimîne em ê têbikoşin û Kobanê neterikînin. Baweriya me ya mezin heye ku em ê bi ser bikevin.”
Ciwanê ji Kobanê yê bi navê Adil diyar kir ku di sala 2014’an de êrîşên li ser Kobanê şikandin û wiha got: “Em bi hêza xwe û ciwanên xwe bawer in. Em niha cihê xwe di çeperên şer de digirin. Em bang li hemû ciwanan bi taybet ciwanên Bakur dikin; Weke sala 2014’an îro jî piştgirî bidin gelê Kobanê! Em ê Kobanê ji Erdogan re bikin gor. Weke ciwanên Kobanê em ji vê re amade ne.”
Ciwanê ji Kobanê yê bi navê Mehmûd diyar kir ku wan bersiva hemû hewldanên êrîşên çeteyên dagirker dan û nehiştin dijmin derbasî axa wan bibe û bang li hemû ciwanên Kurdistanê û di serî de ciwanên Bakur kir ku li dijî êrîşên dagirkeriyê şer bikin.
