MEXMÛR- Li Wargeha Mexmûrê bi boneya Rojbûna Rêber Apo 17’emîn Mîhrîcana Çand û Werzişê ya 4’ê Nîsanê ku her sal ji aliyê Qada Perwerdeya Mexmûrê ve tê amadekirin, destpê kir.
Her sal bi boneya pîrozkirina rojbûna Rêber APO (4’ê Nîsanê) di meha Sibatê de Mihrîcanek ji alyê Qada Perwerdeyê ya Mexmûrê ve tê organîzekirin. Di vê Mihrîcanê de bi qasî du mehan pêşbirkên di aliyê çand û werzişê de tê kirin. Ev Mîhrîcan piranî ji pêşbirkên werzîşî hem di sahayê de û hem jî li ser dikê pêk tên. Îro jî Mîhrîcanê bi tûrnûvaya futbolê ya di navbera xwendevanên keç yên dibistanên amadeyî de destpê kir.
Îsal jî bi tevlîbûna hemû xwendevan û mamostayan ve 17’emîn Mîhrîcana Çand û Werzişê ya 4’ê Nîsanê bi tûrnûvaya futbolê destpê kir. Beriya ku tûrnûva destpê bike, bi kombûna hemû xwendevan û mamosteyan ya li sahayê bi deqeyek rêzgirtinê destpê kir. Piştî rêzgirtinê têkildarî armanca tûrnûvayê Mamoste Beşîr Gabarî axaftinek kir.
Mamoste Beşîr diyar kir ku ew her sal bi boneya pîrozkirina Rojbûna Rêber Apo ango 4’ê Nîsanê Mîhrîcanekê lidar dixin. Lidarxistina vê Mîhrîcanê di Wargeha Mexmûr de wekî çandekê lêhatiye û wiha pêde çû: “Em rojbûna Rêber Apo wekî rojbûna xwe dibînin. Ji ber wê em wek mîhrîcan bi coş û kelecan vê rojê pêşwazî dikin. Ji ber ku di rastiya xwe de rojbûna Rêber Apo, rojbûna gelê Kurde. Ji ber ku di tu şoreş û têkoşînan de kesayetên wisa derneketine ku ji bo her kesê kar bike û 26 salan jiyana xwe di zindanan de derbaz bike. Êdî em dixwazin Rojbûna Rêber Apo bi azadiya wî pêşwazî bikin. Em wek gelê Kurd tînê azadiyê ne, ji bo wê jî divê em êdî Rêber Apo bi fîzîkî azad bikin. Niha Rêber Apo pêvajoyek daye destpêkirin, hêviyên me ji Rêber Apo heye, em dizanin wê Rêbertiya me aştiyek çawa bîne cîhanê. Ji ber ku pêşengê rêbertiya mirovahiyê wê Rêber Apo be. Em vê 17’emîn Mîhrîcana Çand û Werzîşê ya 4’ê Nîsanê li tevahî gelê azadîxwaz, Kurd û bi taybet li gelê wargehê pîroz dikin.”
Piştî axaftinê, turnovaya futbolê di nava xwendevanên keç yên dibisanên amadeyî de destpê kir.
Çavkanî: Rojnews
