NAVENDA NUÇEYAN- Meşa Ciwanên Partiya Wekhevî û Demokrasiyê (DEM) a ji Amedê heta Taxa Amara ya navçeya Helfetî (Helfetî) ya Rihayê bi boneya 76’emîn rojbûna Rêber APO pêk hat di roja xwe ya duyemîn de didome. Meşa ku ji aliyê ciwanan ve bi dirûşmeya “Em bi civaka demokratîk ber bi azadiyê ve dimeşin” hate lidarxistin, gihişt navçeya Curne Rêş a Rihayê.
Ciwanên duh êvarê hatin navçeya Sêweregê û li wir man, danê sibehê çûn serdana goristanê. Ciwanên ku di nav wan de parlamenterên Partiya Wekhevî û Demokrasiyê (DEM) Zekî Îrmez û Onur Duşunmez jî hebûn, berê xwe dan goristana bêkesan, piştre jî goristana Mahmut Zengîn ê ku di çalakiya bi Ferhat Kurtay, Necmî Öner û Eşrefê ya li Tîpa 2 ya Amedê de şehîd bibûn ziyaret kirin. Meclisa Ciwanên DEM’ê Muhsîn Aydogdu got, “Ciwanên welatparêz wê rêya xwe û ya rêhevalên xwe bişopînin.”
Piştre jî ciwan ber bi derketina navçeyê ve meşiyan. Di meşê de bê navber dirûşmeyên “Ciwan fedaî APO ye”, “Jin, jiyan, azadî azad bike Rêbertî”, “Rojbuna te pîroz be ey Rêber APO” hatin berzkirin. Ciwanan di derketina navçeyê de dawî li meşê anîn û bi wesayîtan ber bi Curne Rêş ve ketin rê. Tê plankirin ku ciwanên ku xwe digihînin navçeyê meşekê li dar bixin.
