Cenazeyên kesên di dema qedexeyên derketina derve de jiyana xwe ji dest dan û birin ATK’ê ya Meletiyê, bi salan e nadin malbatên wan. Bi taybetî jî cenazeyên kesên di dema qedexeya derketina derve ya Nisêbînê de jiyana xwe ji dest dane ev nêzî 3 sal in nadin malbatên wan. Bi hinceta encamên ‘DNA’yê derneketine’ cenazeyan nadin malbatan.
MÊRDÎN- Cenazeyên gelek HPG’iyên di pevçûn û êrîşên hewayî de jiyana xwe ji dest dane li Morga Saziya Tiba Edlî (ATK) a Meletiyê tên sekinandin an jî li goristana bêkesan tên veşartin. Cenazeyên kesên di dema qedexeyên derketina derve de jiyana xwe ji dest dan û birin ATK’ê ya Meletiyê, bi salan e nadin malbatên wan. Bi taybetî jî cenazeyên kesên di dema qedexeya derketina derve ya Nisêbînê de jiyana xwe ji dest dane ev nêzî 3 sal in nadin malbatên wan. Bi hinceta encamên ‘DNA’yê derneketine’ cenazeyan nadin malbatan. Heta niha li gor agahiyan 181 cenaze li goristana bêkesan a Meletiyê hatine veşartin. Her wiha hin cenazeyên encamên wan ê DNA’yê derketine jî nadin.
Yek ji van kesên ku ji hêla dewleta tirk a dagirker ve hatiye qetilkirin û cenazeyê wî nayê dayîn jî, birayê A.A. ye. Têkildarî mijarê A.A. axivî û da zanîn ku birayê wî di meha tebaxê de li Dêrsimê di encama êrîşeke hewayî de şehîd bûye. A. diyar kir ku piştî têkoşîneke bi mehan, wan cenazeyê birayê xwe dîtiye û wiha domand: “Lê ev 15 roj in cenazeyê birayê min nadin. Tevî birayê min, 7 kes di êrîşa hewayî de jiyana xwe ji dest dan. Cenazeyên wan jî li Meletiyê ne. Em ji bo cenazeyî çûn Meletiyê û li wir 30 cenaze nîşanî me dan. Lê cenazeyê birayê min di nava van cenazeyan de nebû. Bi zanebûn ev yek kirin. Ji ber ku cenazeyên destpêkê nîşanî me dan.”
Cenaze nas nekirin
Di berdewamê de jî A. Daxuyand ku di serî de emniyetê li wan geriyaye û ev agahî parve kirin: “Gotin ku birayê we li Dêrsimê di êrîşeke hewayî de jiyana xwe ji dest daye û cenazeyê wî li ATK’ê ya Meletiyê ye. Ji me re gotin ‘hûn dikarin biçin Meletiyê û cenazeyê xwe bigirin.’ Wexta em çûn Meletiyê, nivîsgeha dozger got; ‘cenazeyê we tê naskirin.’ Lê me cenaze nas nekir. Me ji wan re got ne li wir e. Lê dîsa jî gotin cenaze li wir e. Ji ber encamên DNA’yê jî nehatibûn, me kir û nekir cenaze nedît. Ewilî min digot an cenazeyê birê min li şûna cenazeyekî din hatiye veşartin, an jî bi zanebûn nadin.”
Prosedûra dijmirovî
A. bi lêv kir ku 15 roj berê ji wan re hatiye gotin ku encamên DNA’yê derketine û wiha dawî li axaftina xwe anî: “Wekî ku min texmîn kiribû, cenaze li goristana bêkesan hatiye veşartin. Niha jî em hewl didin cenazeyê xwe bigirin. 15 roj in em li Edliyeya Mêrdînê nivîsan ji Dozgeriya Dêrsimê û ATK’ya Meletiyê re dinivîsînin. Lê dîsa jî kar û barê cenaze naqede. Em dixwazin em cenazeyê birayê xwe bînin û li vir veşêrin. Lê nadin me. Tim dibêjin prosedurên qanûnî kêm in û cenaze nadin. Em dibêjin ha wê îro bidin ha sibê lê nadin. Ev yek bi zanebûn tê kirin. Em hewl didin di nav vê hefteyê de cenaze bigirin. Bi vî awayî dixwazin malbat dev ji cenazeyên xwe berdin. Naxwazin haya civakê ji van tiştan çêbibin. Lê em ê dev ji cenazeyên xwe bernedin.”
Jêderk: erojname