Li bajarên herêma Cizîrê û li Kobanê pîrozbahiyên Newrozê bi dirûşma “Bi rihê Newrozê em ê tecrîdê bişikînin û Efrînê rizgar bikin” dest pê kir. Bi hezaran şêniyên herêmê tev li pîrozbahiyê bûn. Dayikên ku zarokên wan di şerê li dijî DAIŞ’ê de jiyana xwe ji dest dan agirê Newrozê geş kirin.
NAVENDA NÛÇEYAN – Bi sed hezaran welatiyên Kobanê, Qamişlo, Dêrik û Amûdê li qadên Newrozê kom bûn û bi coşa herî mezin Newrozê pîroz dikin. Gelê Kobanê li li ser girê Miştenûrê Newrozê pîroz dikin. Welatiyên Qamişlo berê xwe da cihê şahiya Newrozê ku li gundê Hîmo tê lidarxistin. Bi deh hezaran şêniyên bajarê Dêrikê û navçeyên wê berê xwe da qada pîrozbahiyê û Newrozê pîroz dikin. Bi hezaran şêniyên navçeya Amûdê li gundê Çaxir ê girêdayî navçeyê kom bûne û bi cil û bergên xwe yên gelêrî Newrozê pîroz dikin.
KOBANÊ
Bi deh hezaran pêkhateyên Kurd û Ereb bi dirûşma “Bi rihê Newrozê em ê tecrîdê bişikînin û Efrînê rizgar bikin” berê xwe da qada pîrozbahiya Newrozê ya Girê Miştenûr. Girseya hatin qada Newrozê agirê Newrozê geş kirin.
Hevserokê Meclisa Rêveber a Rêveberiya Xweser a Bakur û Rojhilatê Sûriyê Ebid Hamid Mehbaş û bi navê Rêveberiya Xweseriya Demokratîk a Herêma Firatê, bi navê jinên herêma Firatê û bi navê hêzên leşkerî wê bi axivin.
Komên girêdayî Navenda Çand û Hunerê ya Baqî Xido, dê dîlan û stranên gelêrî pêşkêş bikin.
QAMIŞLO
Ji saetên sibê ve bi hezaran şêniyên bajarê Qamişlo berê xwe da cihê şahiya Newrozê ku li gundê Hîmo tê lidarxistin. Li cihê pîrozbahiyê ala TEV-DEM`ê, alên YPJ/YPG, QSD û Kongreya Star hatine daliqandin. Hêzên Asayîşê û Hêzên Parastina Civakî parastina cihê pîrozbahiyê dikin. Dayikên ku zarokên wan di şerê li dijî DAIŞ’ê de jiyana xwe ji dest dan Agirê Newrozê pêxistin. Di pîrozbahiyê de endama Koordînasyona Kongreya Star Foza Yûsif, ji rêveberên Kongreya Star Minîca Heyder dê biaxivin. Paşê dê stran ji aliyê koma Erka Xweparastinê, Koma Amara, Koma Zîlan, Koma Dîlan ve dîlan û stranên gelêrî werin pêşkêşkirin. Dê axaftin bi navê partiyên siyasî yên kurdî werin gotin û şanoyek ji aliyê Tevgera Çand û Hunerê ve were pêşkêşkirin.
DÊRIK
Bi deh hezaran şêniyên bajarê Dêrikê û navçeyên wê berê xwe da qada pîrozbahiyê û Newrozê pîroz dikin. Bi deh hezaran şêniyên bajarê Dêrikê û navçeyên li qada Newrozê kom bûne û Newroza xwe pîroz dikin. Her kes bi cil û bergên xwe yên gelêrî tev li pîrozbahiyê bûne. Li cihê pîrozbahiyê al û sembolên kurdî hatine daliqandin. Piştî rêzgirtinê agirê Newrozê ji aliyê dayikên şehîdan ve hat pêxistin û li dengê Rêberê Gelê Kurd Abdullah Ocalan hat guhdarkirin. Tê payîn ku axaftin bi navê saziyan di pîrozbahiyê de werin kirin.
AMÛDÊ
Li navçeya Amûdê pîrozbahiya Newrozê bi pêxistina agirê Newrozê dest pê kir. Bi hezaran şêniyên navçeya Amûdê li gundê Çaxir ê girêdayî navçeyê kom bûne û bi cil û bergên xwe yên gelêrî Newrozê pîroz dikin. Li cihê pîrozbahiyê ala YPJ/YPG û QSD`ê hatine daliqandin Agirê Newrozê ji aliyê dayikên şehîdan ve hat pêxistin. Tê payîn ku dê axaftin werin kirin.
