QENDÎL – Bi pêşengiya Ciwanên Welatparêz û Çalakvanên Mertalên Zindî û beşdarbûna hezaran kesî ku ji hemû parçeyên Kurdistanê li Binarê Qendîlê 35. salvegera Pêngava 15’ê Tebaxê hate pîrozkirin.
Li rexmê liv û tevgera balafirên şer yên dewleta Tirk a dagirker ku gundên Binarê Qendîlê bombebaran jî kir, bi hezaran kesî li Binarê Qendîkê Pêngava 15’ê Tebaxê pîroz kirin. Di pîrozbahiyê hunermendan berhemên xwe pêşkêş kirin.
Herwiha di pîrozbahiyê de peyama KCK’ê û KJK’ê jî hate xwendin.
Di pîrozvahiyê de peyama Hevserokatiya Rêveberiya Koma Civakên Kurdistanê (KCK) hate xwendin. Di peyamê de wiha tê gotin;”Pêngava 15’ê Tebaxê li gelê Kurd, Rêber Apo, xaziyên gerîla, malbatên şehîdan, hevrêyên li zindanan, li gerîlayan û gelên Rojhilata Navîn hemûyan pîroz be. Em bi deh hezaran şehîdên xwe yên ku 35 sal in serketinên mezin afirandin û pêngava 15’ê Tebaxê domandin bi minet û rêzdarî bi bîr tînin. Kurdistana azad û Rojhilata Navîn a demokratîk, ku hesreta Egîd, Zîlan, Şîlan Kobanê, Erdal, Nûda Karker, Delal Amed, Atakan Mahîr, Şevîn Bîngol, Huseyîn Mahîr, Sari Îbrahîm, Helmet, Zekî Şengalî, Rustem Cûdî, Sînanê Sor, Xebat Dêrik, Reşît Serdar û şehîdên me hemûyan bû wê teqez pêk were.
Têkoşîna gerîla ye ku 35 sal in bênavber bi rengekî fedayî didome. Têkoşîna gerîla ku bi berdêlên mezin hate xurtkirin serketinên mezin afirand. Xwe gihandiye beşeke mezin a armancên xwe. Ti berdêl û ked belasebep nebûye.
Ji dema ku pêngava 15’ê Tebaxê vejîn kiriye û vir ve 15’ê Tebaxê weke Roja Vejînê tê pîrozkirin. Pêngava gerîla ya 15’ê Tebaxê şoreşên welê afirand ku li Kurdistan û Rojhilata Navîn bû sedema pêşketinên di dîroka dinyayê de kêm caran hatine dîtin. Pêngava gerîla ya 15’ê Tebaxê şoreşa neteweyî, şoreşa demokratîk, şoreşa civakî, şoreşa siyasî û şoreşa çandî pêk aniye. Şoreşên pêk hatin roj bi roj berfireh dibin û kûr dibin.
Destketî hemû bi berdêlên giran hatin afirandin. Ne tenê gerîla, gelê me bi jin, ciwan, extiyar bi hemû beşên xwe berdêlên giran û êşên giran dîtin. Tiştek ji ber xwe ve nehatiya afirandin, ji ber xwe ve dom nake. Ji ber vê yekê divê her kes bi qîmetê pîrozmehiyê nêzî nirxên pêngava 15’ê Tebaxê bibe. Divê nêzîkatiyeke welê neyê nîşandan ku nirxên hatine afirandin bi rengekî şexsî, madiyatî, berjewendî û bi hêsanî hatine afirandin. Nirxên heyî bi berdêlên giran hatine afirandin û tenê bi fedakarî, ked û hewldanan dikarin bên parastin. Ji ber vê yekê divê bi cidiyet û berpirsyariyê nêzî nirxan bibin, nirxên heyî bikin bingeha serketin û destketiyên nû. Divê nirx û destektiyên nû li yên heyî bên zêdekirin.
Di sala 36’an a vejînê de ku wê têkoşîna gerîla mezintir bibe, em bang li gelê xwe, jin, ciwanan û dostan dikin ku li dijî faşîzma AKP-MHP’ê ya ku li her deverê êrîşî gelê Kurd û destketiyan dike têkoşînê mezin bikin, tevlîbûna li nava refên gerîla zêde bikin û ji hesreta bi deh hezaran şehîdên me re bibin bersiv.”
Di pîrozbahiyê de peyama KJK’ê jî hate xwendin.
KJK’ê Pêngava 15’ê Tebaxê li tevahiya Şehîdan pîroz kir û wiha tê gotin;”Em cejna azadiyê 15’ê Tebaxê li jinan, gelê xwe û mirovahiya pêşverû pîroz dikin. Pêngava leşkerî ya 15’ê Tebaxê di heman demê de destpêka tolhildana şoreşgerî ya li dijî kiryarên kujer û êşkencekar ên li zindana Amedê ye. Ji rojên ku hebûna gel û welatê me dihate nîqaşkirin em gihîştin serdemeke welê ku hebûna mêtingeriyê ya li welatê me bûye mijara nîqaşê, rastiya me ya fedayî ku bi keda Egîdan, Zîlanan, Mazlûman, Kemal Pîran, Hakî Kareran, Delalan, Atakanan, Medya Mawayan, Armancan, Helmetan hate afirandin niha li Rojava, ji Şengalê heta Botanê, Dersimê, Bradostê, Derya Reş derbên giran li mêtingeriyê dixe. Lewma ‘fîşeka destpêkê’ Pêngava 15’ê Tebaxê pêngaveke nû ya îdeolojîk, polîtîk rêxistinî, xeteke nû ya şer û jiyanê ye.”
Helmet Kerkûkî peyama Komeleya Ciwanên Welatparêz ên Kurdistanê xwend. Kerkûkî got: “Bila dijmin baş bizanin ku dibe hevrê Helmet şehîd kiribin, lê ruhî hevrê Helmet ê berdaye nava xakê, li nava dil û mejiyê her ciwanekê de ye.”
Di dawiya bernameya pîrozbahiyê de dengbêj Şeyda Qewamî, Kerîm Xan Surçî û koma govendê ya Destanî Qendîl, koma muzîkê ya Rojava û çend hunermendên din derketin ser dikê û hunerên xwe pêşkêş kirin. Şahî bi gerandina govend û stranan bi dawî bû.
