PÊNCIWÊN — Bi salane sozên ji bo çêkirina rêya Pênciwên, Silêmanî û Seydsadiq tên dayîn, lê ev soz nehatine bicihanîn û ev rê niha bûye metirsiyeke mezin li ser jiyana rêwiyan, lewma şofêr daxwaz dikin ku rê were çêkirin da ku ji qerebalixî û qezayan xilas bibin.
- Bi salane sozên ji bo çêkirina rêya Pênciwên, Silêmanî û Seydsadiq tên dayîn lê nayên bicihanîn.
- Navçeya Pênciwênê ya çiyayî û asê xwediyê du dergehên sînorî yên giring e, lê rêya wê nekirine du alî.
- Şofêr û xelkê navçeyê ji ber xirabiya rê û polîtîkayên paşguhxistinê nerazî ne.
Rewşa Rê û Bandora Wê Li Ser Jiyana Xelkê
Ji ber ku navçeya Pênciwênê ya ser bi parêzgeha Silêmaniyê navçeyeke çiyayî û asê ye, herwiha du dergehên sînorî yên giring lê hene, heta niha rêya wê bi temamî nehatiye çêkirin û nekirine du alî; ev yek jî bûye sedema pirsgirêkeke mezin ji bo xelkê navçeyê. Derbarê mijarê de şofêrên Pênciwênê ji ajansa me re axivîn.
Gotinên Şofêran: “Rêya Pênciwênê Bi Temamî Xirabûye”
Şofêrekî xelkê Pênciwênê yê bi navê Xerîb Osman ku rojane li ser vê rêyê hatûçûnê dike, ji ajansa me re axivî û got: “Rêya Pênciwênê bi temamî xirabûye, tijî çale û wesayît tê de mîna hev dihejin. Navçeya me di her warî de hatiye paşguhkirin û kes guh nade pirsgirêkên Pênciwênê. Gelo du dergehên sînorî li ser vê navçeyê hene, lê çi ji bo vir hatiye kirin?” Osman di dewama axaftina xwe de diyar kir ku ev rê tenê bi pînekirinê nayê çêkirin û li Kurdistanê ti cih weke Pênciwênê nehatiye piştguhkirin. Her wiha da zanîn ku hemû barhilgir li ser vê rêyê re derbas dibin, lê li şûna ku rê were çêkirin û xizmetguzarî were pêşkêşkirin, tenê dûman û qirêjî para wane.
Pêşeroja Bûyeran
Şofêrekî din ê bi navê Omer Ehmed axivî û got: “Em rojane vê rêyê bikar tînin. Ji ber xirabiya rê, pirsgirêkên me yên mezin çêdibin. Divê ev rê bibe du alî, ji ber ku xelkê Şarezûr, Seydsadiq û xelkê ku ji bo kar û rûniştina li wir in bi vê yekê re rû bi rû ne.”
Çavkanî: Rojnews Kurmancî