SILÊMANÎ — Pêşmergeya jin Sirwe Nûrî di daxuyaniyeke taybet de bal kişand ser girîngiya nivîsîna dîroka jinan, rola wan a di têkoşîn û ragihandinê de, her wiha destnîşan kir ku yekrêzî rêyeke sereke ye ji bo parastina xak û welat, û hişyarî da ku tiştê rejîma Baasê nikarîbû bike niha di jêr ala Kurdistanê de tê kirin.
- Pêşmergeya Jin Sirwe Nûrî qala bîranînên têkoşîn û jiyana çiya ya li dijî rejîma Baasê kir.
- Nûrî diyar kir ku ji ber zilm, zordarî û polîtîkayên bêparhiştina ji mafên zimanî û neteweyî neçar ma berê xwe bide çiya.
- Wê anî ziman ku di meha yekem a sala 1981’an de gihiştiye devera rêveberiyê ya li Tûşele, Nawzang û Zelê.
Sedemên tevlîbûna bi nava refên têkoşînê de
Têkildarî bîranînên têkoşîn û jiyana çiya ya li dijî rejîma Baasê, rola jinan di têkoşîn û ragihandinê de, girîngiya nivîsandina dîroka jinan û pêwîstiya yekitiya Kurdan a parastina axê û bidestxistina mafên neteweyî de, Pêşmergeya Jin Sirwe Nûrî ji ajansa Rojnewsê re axivî. Sirwe Nûrî destpêkê qala sedemên tevlîbûna xwe ya bi rêxistinê re kir û îşaret bi zilm û zordariya rejîma Baasê ya li dijî gelê Kurd kir û ev got: “Têkbirina Kurdan û bêparhiştina ji mafên neteweyî û zimanî kir ku ez nikaribim bêdeng bim û dest ji têkoşînê berdim. Min di destpêkê de li deverê dest bi xebatê kir û bûm endamê Komeleya Şanogerên Kurdistanê, lê di dawiya salên heftêyan de piştî ku ez hatim agahdarkirin ku di bin çavdêriya partiya Baasê de me, neçar min berê xwe da çiya.”
Gihîştina devera Zelê û pêşwazîkirina ji aliyê jinên pêşeng ve
Pêşmergeya Jin Sirwe Nûrî ev anî ziman: “Di meha yekem a sala 1981’an de ez gihiştim devera rêveberiyê ya li Tûşele, Nawzang û Zelê. Wê salê ji ber barana zêde ya berfê, veguhastina ji cihekî ber bi cihekî din ve bi rêya peyatî pêk dihat. Dema ez gihiştim rêveberiyê ya li Zelê, ji aliyê jinên pêşeng ve hatim pêşwazîkirin. Tevî ku hejmara wan kêm bû jî, wê demê Ronakî Şêx Cenab, Pakîz, Dilgîrxan û jinên din di nava civakê de amadebûn.”
Pêşeroja Bûyeran
Sirwe Nûrî di dawiya axaftinên xwe de destnîşan kir ku tevî ew di şer de rasterast cih negirtibe jî, têkoşîna di nava refên azadiyê de û parastina nirxên neteweyî erkeke bingehîn e û got ku ewa ku Sedam nekarî bike, niha di jêr ala Kurdistanê de tê kirin.
Çavkanî: Rojnews Kurmancî